NUNNA KAWNGTHUAMPUIAH (REVIEW)

(Hei hi Sabereka Khuangkaih chanchinbu, Lalrammmawia Ngente-in a en kawl lai, 2004 khan tih chhuah a ni tawh.)

HMANGAIHNA ROPUINA

Lehkhabu hming: Nunna Kawngthuampuiah Edition : 3rd  Kum: 2004, phek:221

Khawvelin a hmelhriat tawh zinga hmangaihna ropui ber chu van ropuina zawng zawng kal san a, a thil siamte sual laka chhandam tura Isua Krista he leia mihringa lo piang a, Kraws-a lei mihringte tana nunna hlantu hmangaihna kawng a rawn  zawh kha a ni awm e.

A ni! Hmangaihna dik tak chu hmangaih tlak loh hmangaih a, zawnchhuah tlak tawh loh zawnchhuah hi a ni.

Pathian hmangaihna ang em em chu ni lo mah se, Zikpuii Pa’n, “Ka masterpiece” a tih hial ‘Nunna Kawngthuampuiah’ tih Novel-ah hian hmangaihna dik leh ropui chu kan hmu a ni. ( ‘Ka masterpiece’ a lo mai erawh hi chu, a ti sual ve deuh niin ka hria. A masterpiece chu a ni teh meuh mai. Mahse, kan masterpiece te hi chu midang min thlan sak tur ni awm tak?)  A thilsiam mihring pakhat, India hmarchhak tawpa seilian ve maiin heti khawpa nasaa hmangaihna a nei a, chu chuan a nawr kal a nih si chuan Pathian hmangaihna phei chu eng ang takin nasa ang maw?

Tum thum lai chhut a ni ta. A chhut hnuhnung ber kan thlir a. RTM Press chhut a ni a, sulhnu pawr hmuh tur a awm fur mai. A chhutute thiam loh liau liau a ni. 1989 khan chhut hmasa ber chu a chhuak a, Part I leh part II a then a ni a. 1995 khan chhut nawn a ni a, Part I & II chu lehkhabu pakhatah kaihkawp a ni ta a, a kawmah Mizo painter hlawhtling Tlangrokhuma lemziah chhut kai a ni ta bawk.

He lehkhabu-ah hian hmangaihna chu a lai takah a awm a, chumi hual chuan thil dangte chu an vir vel a ni. Planet pakuate’n ni an hel a, ni atangin lumna an hmu a, enna an hmu ang hian hmangaihna chuan he thawnthu hi a chhun eng a, beisei bo tawh hnu beiseina  a pe a, dinhmun chhe tawhte a khai chhuak a, hmangaihna hmachhuantute mal a sawm a, hmangaihna chuan kawng a ti eng a ni. Chu hmangaihna chuan mizo tlangval Chhuanvawra chu thuam a ni a. ‘Hmangaihna chuan engkim a tuk dawl’ an lo tih thin chu he thawnthu-ah hian a dikna kan lo hmu ta a ni.

‘A tawpah chuan hmangaihna chauh a ding chang ang’ tih pawh a dikna kan hmu- Zikpuii Pa’n epiloque a ziah lehah hian, Capt. Ranade-a chu a hnunglam a sual te’n a rawn um pha leh a ni tih min hmuh tir hi. Hmangaihna hmanga thuam Chhuanvawra chuan hmangaih tlak tawh loh Ngurthansangi chu a zawng chhuak a, hmangaihna hual vel karah chhungkua an din ta a ni tih kan hmu.

Khaw Pathum… He thawnthuah hian khaw pahnih..Ni lo..Khaw Pathum pawimawh em em a awm. Chhuanvawra leh Ngurthansangi pian leh seilenna khua, Zopui, Chhuanvawra lehkha zirna hmun-Zofate thinlung leh History-a khawpui pawimawh tak pakhat, India rama Hill Station hming thang berte zinga mi, kum 1864 daih tawh a, Bristish Assam Capital lo ni tawh ‘Shillong’ khawpui te leh; French architect hmingthang M Le Corbushier-a khawpui duan, India rama khawpui mawi leh hmingthang ber pawl Chandigarh te chu. He khuaah hian he thawnthu hian a vawrtawp (Climax)a  thleng kan ti thei ang.

Zikpuii Pa hian a thawnthu-ah reng reng hian Character a dah lian em em a. He thawnthu-ah pawh hian Chhuanvawra Character-chu a thawnthu laimu a ni.

He thawnthu hi Historical novel a nih rualin Dramatic/Scenic Novel a nih tel ve avangin a thawnthua  ziah lai hian Plot fimkhur takin a duang fel phawt anga, settings an thlang leh anga, character hi rem takin a bel ta a ni mai thei. Thawnthu ziaktu-in plot a rem thiam phawt chuan Character ropui tak a din chhuak thei a ni. Character duhawm tak pahnih, Chhuanvawra leh Ngurthansangi kan hmu reng a ni. Chutiang a nih loh chuan, Chhuanvawra hi a siam puitling a, amah milin a thawnthu hi a her rem a ni ngei ang. Tin, sub-plot kherkhiap lutuk hmang loin simple plot a hmang a, mizo thawnthu chhiartu tam ber (General reader) te rilrem zawng tak a ni.

Ngurthansangi i sep ang. Ngurthansangi chu thinlung tha leh hmel duhawm lutuk a ni.

“A hmelah chuan khawvel hi a tharin alang thin a, ni eng leh zan thimte hian ngaihnawmna rawng thar an inthuam a, an danglam tak tak lo. Amah hmu phak lo a duhthusam chuan a hmel ang chu sam phak a ni lo. A hnar ngul a sangin a ngil a; a mitmeng a mawi a, a ngaih la tawk chauhin a mithmul a er a, a han nui chu a mawizia chu sawi turin a hmuha  hmuh a ngai a ni. A taksa a hleitlingin pian a thiam a, Mizo fate zingah hetiang a lo piang ve hi chawimawina kan chantheih sang ber a ni. Khawvelah hian mi tlemte hi mi piangfuh an awm a, chutiang bawkin a ni pawh, chhun tur zawng zawng leh chhun theih zawngte khumin, maktakin khuanu ruatin a lo chawr chhuak a, a mawi mai a ni lova, amah chu mawina  a ni. (Helai taka Ngurthansangi hmelthatzia Zikpuii Pa’n a ziah lai hian C. Thuamluaia ‘Leitlang Dingdi’ kha a rilruah a awm ve ngeiin i ring em?) Mizo Thawnthu-a a changtunu kan hmuhtawh hoah chuan Ngurthansangi a hmelthain a la duhawm ber mai awm mange a tih theih.

Dr.H. Lallungmuana Jenny- “A chipui nih ngawt pawh vanneihna leh malsawmna chungchuang…..leilung mawitu bungraw nalh famkim, Angel leh mihring inkara piang nia mawi, tuitai ni chuang ang pheu, a han nuite chu chuankite kau ang hei, a heh sen dan chu hnawih chawp ngai lo, zohniar kaihluih anga vam sen hiam..”-i hi nge hmelthain duhawm zawk ang, Zikpuii pa Ngurthansangi hi le?

Hetiang khawpa hmeltha chungchuang hi ni mah se vanduaina thlarau chuan a kal kan bik lo a, a duh lo chu’ng Capt. Ranade-a’n a nei lui a. Vairam rilah High Class nawhchi zuarah tangin Rita Moonlight Belle hmingpuin mizote’n kan la tawn ngailoh tawngin hmingthan dan chi dangin a hmingthang ta a ni.Hmangaihna pasaltha chuan a la rawn zawng chhuak ang.

Chhuanvawra hi mipa hi a ni. Chhuanvawra hi mipa a ni. A ngaihzawng, a hmangaih em em, Sunday School-a a zirtir thin chu a it a, thlama sual a tum ta hial a. A hur bik vang a ni lo-Mipa a ni. Hetiang kawngah chauh ni lo, kawng tluanin mipa a ni. Chuvang hian hetiang i sawi teh ang:

He thawnthu-ah hian Chhuanvawra chu a lai takah a awm a, thil thleng dangte leh mi dangte hian an hel kual a ni a tih theih awm e. Chhuanvawra thinlung chhungrilah chuan Ngurthansangi a awm tlat. Chu chu hmangaihna kawngkhar chuan a khar hnan tlat a. A tel loa nun pawh chu awmzia awmin a hre lo. Ngurthansangi tel lo chuan khawvel hi engmah lo mai a ni a, Ngurthansangi tan a nih phawt chuan a nunna hial a hlan phal.

Rambuai laia hmun him zawka a awm pawh; Ngurthansangi sipai kutah a awm  tih a han hriat chuan a chhungte phal lo chung, a exam tur neih pawh kalsanin Zoram lam a pan a, Jail-ah a tan phah hial. Chandigarh-ah pawh Punjab Police ho a chawk tho a, chu khua chu a chawk danglam vek a nih kha.

Hming vuah thiam lo. Zikpuii pa hi lehkhabu leh thawnthu hming vuah thiam lo ber a ni hial awm e. A kutchhuak ho han en reng reng hian mi a lem em em lo. Chutih rual erawh chuan, lehkh leh thawnthu hming mawi leh inhmeh em em hi engnge maw  a sawngsawhlawtna chuang le a tih theih awm e. A ziaktu chuan a bu hmingah a duh duha vuah thei teh meuh mai. Chutih rual erawh chuan, lehkhabu chu hralh tura tih a ni a, lehkhabu hming lei chakawm deuh chu a awm ve thin a ni lawm ni?? ‘Kraws bulah chuan’ han tih ngawtte hi, Pathian thu ni hauh lo mah se, a b u hming atang chuan sermon lam kaihhnawih niawm tak a ni a, chuti lam tui lutuk lo chuan a lei loh phah fo mai thei.

Kan lehkhabu thlir lai mek pawh hi B. Lalthangliana’n, “ A changtupa Chhuanvawra’n Shillonga inter-college a neihnaa a tan dan leh thu kalhmang atangte, IAS leh IPS aia IFS a thaln zawk nachhan atangte leh a hmangaih Ngurthansangi’n a nawhchizawrh hlawkna Rs. 650,000 lai a halral vek atangte hian nunn a kawngthuampui dik tak, he lehkhabu thuchah chu kan hmu thei ngei ang” a ti tak na a, ‘Nunna kawngthuampuiah’ awm reng reng ka hmu thiam ve hauh lo. Thuchah tarlan tum bik em em  a neih pawh ka hmu ve lo- ka mawl vang a ni ang.

Ropui ka tih chu.  Khawvela zirtirna leh zirna zawng zawngtea ka zir chhuah ngai loh tur leh Police tan an thuvawn kumhlun tur leh kristian tawh phawtina kan damchhan tur chu phek 185-na paragraph thumna leh lina-ah hian kan hmu.

Chhuanvawra chuan, “Ka hmangaih chu amah leh amah a inngaihsan leh theihna turin a taksa leh rilru chhanchhuah ka duh a ni” a tih leh IGP-in Chhuanvawra hnena, “ Tlangval, chu chu i damchhung hna tur a ni. Misualte’n an sualte an sim theihna tur leh hnehchhiah tuarte’n thinlung zalenna an neih theihna hi Police te hna ropui ber a ni,” a tihte hi Kristiante inkaihhruaina laimu ber tur a ni ngei ang. ( Police tih aiah hian kristian tih han dah la.) Kan Police te pawh hian he thu hi an ngaihtuah thleng ngai em aw?

Phek 176-177-ah hian Kristian philosophy ril tak kan hmu bawk. Ngurthansangi chuan a sual tih a inhria a. A chhungril takah pawh pawi tihna a nei. Mahse, a tanna khur ata chu chhuah ngaihna  a hre lo a, chu nawhchizawrhna bak chu khawvel a nei lo. Chuta tang chuan amah mai chuan chhuah leh ngaihna awm lo. Pathian meubh pawh theihnghilh hial khawpin sualna khurah a duh vang pawh niloin a tang a. Misual ni mahse a thianghlim a ni.

Lal Isua meuh pawh Zakaia inah a thleng a, mite chuan, “Enteh u, misualte leh chhiahkhawntute zingah a thlen saw,” anti a nih kha. Chhiahkhawn hotu Matthaia pawh amah zuitu atan a ko bawk a nih kha. Lal Isua khan anmahniah ‘awm a awm’tih a hria a, hmuh a nei a ni. Chu chu a ni Zikpuii pa pawhin Ngurthansangi kha, ‘ A hmelah chuan vantirhkoh hmel ka zu hmu a,” a tihna kha.

Misual kan tih, sual nih inhria, chhuahna kawng hre lo a sim duh site hi keini hmuh ve dana an pianthar hma hian thi sela pathianin engtin nge a ngaih ang? Kan hre lo. Kan hre phak lo, keini chuan. Hei erawh kan hria- Misual, sual nih inhria, inchhir chu Pathianin a ngaidam thin. Kraws-a ngaihdamna kha han chhiar nawn elh teh. TIta khan a hranpaa ngaihdam a dil kan hre lo. Khenbeh a nih ni la la khan Vanram a kai tih kan hria.

Chhuanvawra phena Zikpuii Pa: Khawvela a kutchhaukte vanga Oscar Award leh Nobel Prize dawng kawp thei awm chhun Pygmalion vanga 1929-a best Screenplay award lo dawng tawhtu, English pa thawmna G.B. Shaw-a lemchan thawnthu kan thlir chuan a changtute’n a ziaktu rilru leh ngaihdan an sawi chhuak thin a.Zikpuii Pa thawnthute hi chutiang chu a ni a, Zikpuii Pa chhungril thui tak kan hmu thei. Kan thawnthu thlir mek phei hi chu, Zikpuii Pa inpuanna ti ila, kan ti sual awm lo e. A morality te, a ram leh hnam hmangaihna te, a nupui a hmangaihna te, a ‘mizona’ te, a tumruhna te, a khawthlir te, a pathian thu pawm dan te leh thil tam tak kan hmu thei a ni. Zikpuii pa kha tunge a lo nih tak tak tih te, a thu leh hla te hi engang chiah nge a lo nih tih kan zir chian duh chuan ‘Nunna Kawngthuampuiah’ tih hi lek chhuak ila, a fun kim ber ang.

A Changtupa Chhuanvawra-ah hian Zikpuii pa a inphum. Harsatna tam tak karah Ngurthansangi, a awmna chin hriat tawh loh, Rita Moonlight Belle, tih hming pua nawhchi lo zuar zawng chhuak leh tu, hmangaihna ropui, dawhtheihna leh inphah hniamna chu Zikpuii Pa atanga lo chawr chhuak kan hmu thei a ni. Amah ngeiin ti hian a sawi, “..Veng hrang hrangah chhai lai lungrualpuite kan han nei ve a, mahse zawi zawiin a  nula langsar lo ber chungah ka rilru a fu ta tlat a. Nupuia neih chu ka tum nghal mai lo a, a ni pawhin min beisei lo. Mahse, chu tak chu a buaithlkna lai a ni. Tleirawl zakthei te, lehkha pawh zir sang lo, mi induh tawk tak, mahse, a lunglenna chu khawvel ram nuam zawk leh sang zawk, nungchang sang leh mawi zawk awmna lam thlir si a ni.Lehkha thiam sang lo mah se, ‘khawvel zirthiamna’ Education of nature a nei sang a, nun thruk hi a hre tlat a ni.

Thlaler Pangpar angin, tuma hmuh leh hriat lohvin, a mawina leh duhawmna chu a rawn parchhuah pui ve a, a mawina leh duhawmna chu ka ngaihtuahin a khawvel tawnchhoh tur chu ka huphurh pui hle a. Chu chu chiang zawka ka han thlir chuan, chu hmeichhe naupang khawngaihthlak tak, pawi sawi silo enkawl chu ka mawhphurhnaah ka dah ta a…Chu nainawk pangpar, tuma hmuh loh, Van arsi anga eng mawi si chu zawi zawia ka hnaih rual rualin a tana that tawklohna chu ka inhre chhuak zel a, mah se, vanneihthlak takin thu leh hlaa ka rilru than chhoh dan ang zelin kan inhmangaihna chu a thangchho ta a ni,” tiin.

A nupui nena an inhmangaihna kawng hi an sawi fo thin a. Chhuanvawar leh Ngurthansangite nunphung leh Zikpuii pa’n ama chanchin a sawi te hi han khaikhin teh. A hmangaihna thinlung ropui tak hi behchhana hmangin, a rilru sang leh tum sang tak te chu tanchhanin, Mizo tlangval, engkima theihtawp chhuah thin hmangaihtu ropui Chhuanvawra Renthlei hi a lo din chhuak ta a ni kan ti thei mai lo maw??

Zikpuii pa-a Mizo:Zikpuii pa hian mizo tlangvalte hi a dahsang lutuk emawni chu aw a tih theih.Chutih lai chuan Zikpuii pa hian engtiklai pawhin Mizo nihna rilru sang tak a pu reng thung. tah hian Zikpuii pa’n mizo hnam tana a thanhnemngaihna rilru kan hmu thei bawk.

Zofate hi Mi hnung zuitu niloin, dinhmun sang ber, mizo zawng zawngte aia tha, mi tih ang ti thei vekah min dah a.Kan thlen phak chin,  leh rah chin zelah hian theihtawp kan chhuah phawt chuan, hnam dang nena ineln aleh thiltih hona reng rengah pawh rual kan khum thei a ni tih tarlan a tum a. Chhuanvawra’n a tih lam a thei zel hle maite hian kan khawvel dai phak chin zelah chuan Zikpuii Pa chuan a tha ber zel min hauh sak a; Khawlhring pachal, kan Critic hmasa Siamkima tawngkam han hawh ila, “ He a thawnthu ziak hian mizo rilru hi van tawngin a vawrh sang ta a ni.” He rilru chhungril tak, Mizo tih hmun chungnung a, thil engkima hnam dangte aia chungnung zawk nih tumna leh nih thinna rilru, Rokunga te’n kan tum san loh zia leh kan hmelthat loh zia hmu reng chunga, ‘Mizo kan ni kan hmel a tha, kan tum a sang bawk si’ an lo tih thinna rilru hi tunlai mizote’n kan mamawh ber a ni.

Ngurthansangi, a kalna  apianga mite ngaihtuahna ti buai map khawpa a hmel an ti tha te, Nawrhchi zawrh a nih pawhin, a sang berah Zikpuii pa’n a han dah tlat mai te hi, a mizo na rilru san zia a hmuh theih a, khawvel hmun zau zawk a hmu a, ani aia hmu zau hi tun thlengin mizo te zingah an awm awm lo e, South America leh Europe-ah te, hnam hmeltha ber ber bulah kum tam tak a tala, chuti chung chuan mizo nula te ala dah hmeltha ber theite hi a ropuiin  a chhinchhiah tlak hle.

Hetia Mizo a dahsang em em mai hi chhan dpawimawh tak a awmin a lang. He thawnthu hi rambuai reh hnu, ‘peace accord’ sign fel hnu vela ziah ni ngeiin alang. Chutih laia mizo rilru tlawm, India laka tlawm zawrhnate kaihharh leh pawh san sak lehna turin Chhuanvawra, tlangval thei chungchuang tak, IPS Acadeny pawha  athei ber hi a lo din chhuak ta a ni thei angem?

Chawimawina Chungchang: He lehkhabu hi 1989-a Mizo tawng lehkhabu chhuak zingah chuan a aia tha ka la hmu lo. MAL-in Book of the year a lo thlan tawh zawng zawng zingah pawh a aia tha hi a awm a nih chuan pakhat chu a awm mai thei, mizoin thawnthu an ziah tawha tha ber pawl chu ala ni tho thoin a alng. Eng chawimawina mah pek a ni thung lo. Chawimawina  a dawn loh chhan nia an sawi ka hriat chu, “Zahmawh alang tam” tih a ni. Ka hre dik lo mai thei a. Tak tak a lo nih ngat chuan khami kuma thlangtute khan mi nuih an la tiza nawn leh dawn a ni. A hnulama lehkhabu thenkhat “MAL Book of the Year”-a an thlan zingah he lehkhabu aia zahmawh lan tlem chuang lohna a awm zui ve leh tho. Eng hi nge maw ‘Literature’ kan tih chu ni dawn ni?

Literature tha kan tih chu hringnun darthlalang dik tak hi a   ni. Hringnun darthlalangah Sex hi  a lan hmaih thiang lo. Mihringa thil awm, mihring ngaihdan, nun dan leh khawsak dan kaihruaitu lian tak chu Sex hi a ni. A tel lo chuan mihring hi a awm thei lo a, literature pawh a tel lo chuan a kim lo. Ngurthansangi vahvaihna zawng zawng pawh a laimu chu, ‘Sex’ kaihhnawih  a ni. ‘Nunna Kawngthuampuiah’ tih atang hian sex hi dah bo teh- Thawnthu awmze nei lo tawpah a chhuak ang a, a ho khawp ang. He thil hi uluk takin mizo te’n kan ngaihtuah chian a tul- Zikpuii Pa hian a tisual lo e.

Engpawh nise, Chhan dang vang pawh nilo, zahmawh a aln tam vang ringawta ‘Book Of The Year’ thlannaa ngaihthah a ni tak tak a nih chuan MAL book of the Year sem thin hian sema nih tirh ata a zahawmna a hloh nghal tihna a ni. Lalhmingliana Saiawi-in, ‘ book of the year dawn chakna ka nei lo e’ a lo tihte pawh hi ka hre thiam ta hle.

Chutiang chu a ni a, chatuan chawlhna hmun duhawm ber leh, hmangaihna daih tawh ngailohnaa a kal tuk, vuia  nih tuma hetih laia Mizo Academy of Letters secretary chuan “ Mizo mipuite hian kan la chawimawi ve hman lo a. Book of the year a thlan turin a lehkhabu chhuah kum nen  ainpelhsawlh deuh a,” tiin a sawi. A thlan kumah ti chhuak se, pek ngei ngei an tum dawmn em ni? Zikpuii pa a nih vangin? He thu hian lehkhabu tha ber thlannan ‘a  lehkhabu leh a chhungthu a pawimawh ber lo a,a thlangtute duhsang zawng nih hi a pawimawh zawk’ tia mi thenkhatin an lo sawi thin hi pawm a ti nuam sawt mai. He thu sawitu hi MAL Book of the Year hmasa ber dawttu a ni a, kan lehkhabu thlir lai tihchhuah  hmasak ber kuma tih chhhuah a ni.

MAL book of the Year chungchang hi tlem han sawi zui lawk ila: Book of the year atana thlan tur tehn fung hrang hrang- Originality and creativity, language and critical analysis, literature and artistic value, layout and general impressions tihte an siam a.Chutiang hmang chuan an teh thin turah ka lo ngai a. Chutiang chu a lo ni chiah lo deuh a ni ang; MAL hruaitu hlun leh Expert Committee te pawha lo tel fo tawh, Book of the year te ngei pawh lo ziak tawhtu chuan kum 2003 book of the year atana thlan ‘Kaqn Bible hi’ tih a review naah chuan, “mimal irawm chhuak thu leh hla phuah chhuah thar mawi leh awmze nei, he’ng tehna bithliahsa-Creativity, Originality, literary and artistic Beauty tih ang chi hmnaga kan teh dawn chuan thlir dan a dang thei mahna le,’ a ti chauh mai. A tehna hmanga an teh siloh chuan engvanginnge a tehna hi an siam? 2003-a Book of The year ziaktu chu mizo pastor chhuanawm ber pawl leh kan mi hmasa Revd. Zairema a ni. A hmaa kan sawi tawh thin, a lehkhabu niloin a thlangtute duhsak zawng nih hi a pawimawh hmasa tih hi a nemnghet em?

Duhtawk dawn ang: He lehkhabu-ah hian sawisel tur ka hmu lo chu a ni lo. A ziaktupain hmangaihna hmun duhawm zawkah min kalsan tawh a, thu leh hla zirchiannaa thil pawimawh thenkhat chauh a tawi zawngin kan tarlang a. Tah chuan duhtawk phawt ila.

Keini te pawh he khawvel thlan hmuna kan lei bawlhhlawh hi a ngawih hun, thlarau aw mawi zawka chhandamtu kan fak ve huna he khawvel hi ala awm zelte a nih ngai chuan thang leh tharte’n he lehkhabu hi an la rawn keu ang a, Mizo an lo ni chu an la inchhuang ve thinin ka ring.Zikpuii Pa thuziak chhiar thei, a tawng ang hmang, a hnampui an nih vang ri ngawt pawhin.

Engpawhnise, he thawnthu hi chu Classic a tling a. Mizo te’n Novel kan neih tawh zawng zawng zingah a aia tha hi chu kan ngah tehchiam lo ang. Kan ziah leh turah pawh a awm belh lutuk lo ang. Zikpuii pa leh a kutchhuakte ang hi chu chhuankhatah hian tum khat emaw chauh kan hmu thin a ni si a.

He review tihtawp nan leh Zikpuii pa pual liau liau atan Abraham Lincoln-a hnuk a chah ruala khatih laia U.S. Secretary of State Edwin M. Stanton-a thusawi hi kan hmang teh ang- “And Now he belongs to the ages.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *