THUAMLUAIA MUAL


Lunglei Khawpuia Thuamluaia Mual hi tunhma chuan Dubi Mual tih a ni thin a. 1st Assam Rifles kutah a awm thin a ni.

Mipuiin an hmang ve thin tho nain an duh angin an hmang hlei thei lo a. Sipai hoin an duh duhin an tibuaiin an chhuhsak thin a.

Mizo Literature-a kan Milian zinga mi, Chhimbial MLA pawh lo ni tawh C. Thuamluaia hmahruaina leh remruatna zarah Dubi Mual chu Assam Rifles kut atanga chhuhsak a niin, mipui vantlang kutah a lo awm leh thei ta a ni.

Sipai kut atanga Dubi Mual chhuhsak a lo ni dan hi tun tum chu i lo ngaithla dawn teh ang.

Lunglei Government College hmunah hian Lunglei High School a awm thin a. Chuta zirlai zing atang chuan An high school football A team thlanna tur inkhelh chu July ni 8 1953 khan an huaihawt a. Inkhel zingah hian Dr.C. Silvera pawh kha a tel ve nghe nghe a ni.

Chawhnu lam a lo nih chuan, Sipai inkhel duhin an rawn ti buai ta a. Buaina a chhuak chho a. Zirlai te pawhin kut an tuar nual a.

A tuk July ni 9, 1953 chuan Headmaster C Thuamluaia beng a lo thleng ta a. Ani chuan, Thil awmzia a han zawt a. An han hrilh fiah chuan, “Engvangin nge in vuak ve loh?” a ti ta nek zawk a. “In strike ngam angem?” In strike ngam loh chuan, ka in resign ang” tih chu an headmaster thu rolum chu a ni. An headmaster thu chu zahin, Lalluia chuan, “Ngam ang” a ti ta a. An headmaster chu a ban tak tak mai an hlau em a, chutianga ti ta mai chu an ni ve bawk.

Headmaster ruahmanna ang thlap chuan zirlaite chuan strike chu an huaihawt a. Kikawn atanga Rahsi veng thlengin kawng an zawh a. An au rual bawk a. Mi 500 lai an tlingin an hria. Tlabung Middle School pawhin hriatthiampuina nawrhna an lo huai hawt ve nghe nghe. A hunlai ngaihtuah chuan mi 500 pungkhawm chu tam tak a ni.

SDO beng a lo thleng a. Sipai lam a ko ve bawk a. Sipaiin Dubi mual an luahma kawngah tan chhan mumal an lo neilo bawk nen, SDO chuan thutlukna siamin Dubi Mipui vantlang kutah july ni 10, 1953 khan a lo awm leh ta a ni.

A hunlaia Mipui vantlangin sipai an hlauh dante ngaihtuah letin Pu Thuamluaia hoa an thiltih hi a ropui hle.

Mizote hian Hruaitu tha leh huaisen, hmala ngam, mi dangte hruaia nawr kal tak tak ngam kan neih phawt chuan thil ropui leh lian tham, tih ngam loh tura ngaih pawh kan ti ngamin, dinhmun sang takah kan invawrh thei ang tih hi ka pawm dan a ni reng.

A thu leh hla ziakte kha Amah C. Thuamluaia kan hriatrengna ni mah se, Dubi Mual, sipai kut atanga chhuhsakna tura a tha thawh leh a hmahruaina hi a sulhnu ropui berte zingah ka ngai. 1922 a piang niin, 1959 May ni 29 chhun dar 11-ah a thi. Kum 37 mi chauh a ni. Dam rei deuh se, Politikah khan chamrei sela, Mizoram dinhmun hi a danglam ngei ang. Lunglei khawpui leh chhimbial dinhmun pawh a danglam daihin ka ring. An tum a, an beih a, an tawrh peih a, an nawr peih phawt chuan Thil ropui tak an ti thei a ni tih inhre nawn leh sela, tan hmun erawh dik selangin.

Dubi mual pawh mipui vantlang laih, mipui ta, dan mumal awmloa sipai luah luih, Mifing leh huaisen te zara mipui ta ni let leh a ni. Dan ang thlapa neih chu nise chhuhsak erawh a har awm e. Kan tanhmun hi dik sela, huai taka din pawh a awl reng reng bawk a ni.

Mi pakhat huaisenna leh finna leh thahnemngaihna vangin vantlang dinhmun a danglam thei.

Lunglei khawpui pawh hian Thuamluaia hi hre reng sela, Thuamluaia mual hi mipui thiltihtheihna entirna a ni tih hre nawn fo sela. Chutah chuan, mizo hnam tan zirlai pawimawh a awm ve bawk a ni.

PASTOR ZATHANGA


Kum 1970 chho vel khan, Serkawn damdawi Ina damlote, “Ka tih theih tawk” tia nitin Tawngtai sak thin Putar pakhat kum 90 mi zet tawh hi a awm thin a. 1976 khan, Kum 96 mi niin, Chatuana Chawlhna hmun duhawmah a Hawng ta a ni.

A thatlaia Pastor chhuanawm tak ni chung khan, Zathanga khan, “ Ka han tlangval a, van naran tih ka ni a; pa ka han ni a, Pa naran tih ka ni a; Tirhkoh ka han ni a, Tirhkoh naran ka ni a; pastor ka han ni a, pastor naran ka ni a; tar ka han ni a, tar naran niin ka tawp ka thleng ta a ni” a ti tak nain, Zathanga kha Mi naran, Pastor naran a ni ngai lo.

1913 Chho khan, Pu Buanga’n Mizo tawng dictionary a siamna leh thuthlung Thar lehlinaah a pui a. 1923-ah Mizo tawng thutthlung Thar Bu pumpui buaipuiin Kolkata-ah Thlaruk a cham a. Phek 684 lai a ni a. Proof reading a bei chhuak vek a ni. Pu Buanga nen heta zu chhuk dun hi a ni a. 1924 khan, Thuthlung Thar Bu pum hi kan lo beu thei ta a ni. Assistant Headman leh Company Commander niin indopui pakhatna leh pahnihna a kal bawk a. 1963-ah 1912a Theiriat Nula Nupui atana a neih, Chawngthuami chuan a thihsan a. Bible lehlin hnaah theihtawp chhuahin a nupui sunna hun chu a hmang a. 1964 August thleng Bible lehlin hna a thawk.

Kum 90 zet a ni tawh pawhin, a phak tawka a tih theih sang ber nia a hriat, “Ka tih theih tawk a ni” ti chungin Damlote tana Tawngtaiin a tar kun hun pawh chu a la hmang cheu a ni.

Kan Kum upat chhoh dan ang zelin, kan finna leh theihna pun leh tlakhniam dan angzelin, mi dangte tana tangkaiin, “Kan Tih theih tawk” tihtur kan nei theuh a ni. Mahni hmasiala, mahni inhmangaih a, mi dangte la kata inlakhranna hian engmah min thlen lo.

Kan chhungkaw tan, Mi dangte tan, Society tan, kan ram leh hnam tan, kan tih theih tawk I ti ang u.

PASTOR PALI CHHER CHHUAKTU THANZINGA


Zoram Baptist kohhran, chhim leh kohhran ramri thiah hmaa Chhim lam chan Pastor te kha chhuanawm tak tak leh fel tak tak an awm a. Zirna lamah erawh chuan sang tak tak an ni kher lem lo.

Pastor Chuautera, Pastor Challiana, Pastor Haudala, Pastor Zathanga, Pastor Sawiluaia, pastor Thanzinga etc te kha an hming han lam mai awlsam an ni.

Rev. Dr. CL Hminga i sawilo inti mai thei a, a pa chanchin ka sawi dawn avangin Rev. Dr. CL Hminga hi lam nghallo ka ni.

Pastor Thanzinga hi a fate Pahnih CL Rema leh CL Hminga hi pastor an ni zui a. CL Rema chu missionary a ni thung a. CL Hminga chu chhim lam kohhran banpui tih ngam khawp a ni zui a. A fate pahnih bakah hian a in chhunga a enkawl, Lama leh Lalzarzova te chu Pastor an ni zui a. A in chhung atangin pastor pali a chhuah tihna a nih chu. A fapa te zinga pakhat CL Ruala chu MP te hial a han ni bawk.

1956 a IAS zawm C Lalrema kha
1955-56 khan Central KTP committee member a ni a. KTP General Conference hmasa ber 1954 a neihah khan Inrinni zanah thupui a sawi a. A thupui chu, “The End of Salvation-Saved to serve” tih a ni.

Assam State a chanvo pawimawh tak tak a chelh laiin, 1967 khan India sawrkarin hmarchhaka missionary zawng zawng te hnawhchhuah tur thu a puan avangin, Baptist General Assembly chuan anmahni pui turin vawi tam tak a sawm a. Chu chu Pathian kohnaa ngaiin, January 1969 khan IAS atanga bangin Missionary-ah a kal ta a ni. IAS chu kum 13 a thawk hman tihna a nih chu.

Missionary a luh hnu hian India ram leh khawvel pum huap rawngbawlna chanvo pawimawh tak tak chelhin ropui takin Lalpan a chawisang ta zel a ni.

Tunah chuan Van Ropuina sinin a chawl hah dam ta…

Hetianga a fate leh a inchhunga a mi enkawlte chhuanawm taka chhuah theitu Thanzinga kha Chhangte hnam a ni a. A pa chu Nova a ni a, a nu chu Zachhinglali Hauhnar a ni. 1889 a piang a ni a, Kohhran Upa leh Tirhkoh te a nih zak zak hnuin 1927 khan Pastor atan nemngheh a ni a, nemngheh a nih dawn tum hian an exam naah full mark 600-ah mark 473 a hmu a ni.

A hranpaa lehkha zirna a nei lo a, Sunday School-a ziak leh chhiar inzir thiama, pastora nemngheh tlak khawpa inzir chho a ni a. Lehkhabu a chhiar nasa a, Mizo tawng lehkhabu a ban phak tawh phawt chu a leiin, a chhiar vek zel a, engtik lai mahin sitawmin a awm ngailo.

Pa mak ve tak a ni a. Tumkhat chu nu pakhat hian ka pum a na a ti a, a tal tal a. Nuthlawi fa chhawm neia pasal nei leh a ni a. A pasal silai chu ama fa bik tana dah a nih loh chuan a pum a na zel dawn a ni tih a sawi a. Pastor Thanzinga chu an han rawn a, engtia tih tur nge ni an ti a, ani chuan a pum nat thu a sawi leh vel leh in vaw hrep dawn nia a lo ti mai si a. A pum na a han tih chhuah leh chuan, an vaw hrep mai a. Chu nu chuan, a pum na a sawi leh ta ngai miah lo a ni awm e.

Hmun killhawr ber bera awm thin, tawngtai ngaina mi, sikul kal miah loa Sunday School atanga ziak leh chhiar zir chawp chunga pastor ni thei, a inchhung khura a naupang enkawl (a fate leh Mi dang) zing atanga pastor pali chhuah thei, IAS leh India ram rorelna sang bera thupha pawh a fate zinga awm tir thei pastor chhuanawm tak leh inngaitlawm tak, “Rawngbawl tih tlak pawh ka ni lo e” ti hialtu Thanzinga khan, April ni 14, 1964 khan serkawn atangin vanram a pan a. A tukah serkawn Biak Inah vui a niin, zohnuai thlanmualah phum a ni.

HRINGNUN RIMAWI


Mozart-a kha, 1756-ah a piang a. Kum 5 chauh a nihin Music a tum thiam em em tawh a, a phuah (composed) thiam tawh a. Europe ram hrang hrang Lal te hmaah a Rimawi a tum der tawh a ni.

Music composer ropui a ni a, Classical era-a Composer thawhhlawk leh nghawng ngah berte zing a mi a ni. 1791 khan a thi.

Western Classical Music Chanchin ziaktute chuan, hunpui hrang hrangah an then a, Mediaval, renaissance, Baroque, Classical, Romantic, Impressionist, Modern, High Modern, 20th Century, Contemporary, Postmodern, 21st Century titein.

Classical Hun hi Barouqe hun leh Romantic hun inkar a mi a ni a. Baroque huna an music ai chuan, a zangkhai a, a hahdam zawk a, a fel fai zawk bawk a. Instrument pawimawh berah pawh, harpsichord niloin Piano a lo ni ta bawk a. An music siamtu lang sar te chu, Joseph Haydn, Mozart, Beethoven, Schubert-a te an ni.

A kutchhuak ropui berte zinga mi, Requiem a phuah laiin, Kum 35 mi chauh niin a thi ta hlauh a. Joseph Haydn-a chuan, “kum 100 hnuah pawh a ni ang hi an piang leh tawh lo ang” a ti hial a ni!
Music phuah kawngah hian thuvawn pawimawh deuh pahnih a nei a:-

  1. Minute tlem te danah Orchestra chuan an music kal dan leh tih rik dan a thlak tur a ni. Chuti chuan, Ngaithlatute’n thil dang an lo ti lo anga, an lo titi loin, buaipui dang an lo nei hman lo ang. An tuipui reng theihna turin, music rik dan ngai ngawr ngawr loin chet kual tur a ni.
  2. Music hlawm hrang hrangte chu, Then thum emaw, then liah emaw then sawm tur a ni. Chuti chuan, a kar lakah mipuiin, kut lo benna remchang te a awmang a…An music tum laia nghawng buai thei tur pawh a kar lakah an buailoh phah ang.

Hetiang Innghahna hmang hian 1750 hnu lama Music siamtute chuan an music siamte chu an kalpui ta a ni.

Chu chu an hlawhtlinpui ta reng bawk a!

Hringnunah pawh hian Rimawi siam chhuak tura, Nun hlawhtling nei tur chuan, Mi dangte tan hunk an pek angai ve thin a. Kan nunah hian mi dangte tel ve na remchang kan siam angai ve thin a ni. Kan Nunah buaina kan tawk thei a ni tih hriain, chutiang buaian chingfel thei tur pawh chuan, hun inpek kan la tum cheu tur a ni.

Orchestra chu mi dangte thlir tura siam, Mi dangte ngaihthlak tlaka siam a ni a. Chutiang a nih theihnan chuan, Inghahna thlutlung an nei thin a ni. Hringnun Rimawi, Nun duhawm, Mi dangte thlir tlak leh mi dangte ngaithlak tlak nei tur chuan, Innghahna leh ngaihdan bulfuk tak neia kan nun kan hman thin angai a ni.

KHUM RUALLOH C. KHUMA


L. Biakliana ziah, Hawilopari tih kha mizo novel ziah hmasak bera pawm a ni nain, khawlchhuta a bua tih chhuah hmasak ber a ni lo a. Maymyo Sanapui tih Challiankhuma, Capt. C. Khuma ziah kha khawlchhut chhuak hmasa ber a ni. 1950 khan tih chhuah a ni.

A ziaktu Capt C. Khuma chanchin hi tun tum chu kan sawi dawn a ni.

Kan mi hmasate chanchin hi kan sawi fo a, kan sawi fo a tul chhan chu, zui tur awmloa mahnia kawng inzawn chawpa, kan hnam tana mellung pawimawh tak tak lo phun a, rahbi thar min kaipuitu an nih thin vang a ni.

Capt.C. Khuma kha 1914 ah Ailawng khuaah a piang a. Reiekah a seilian thunh. 1934 khan Burma Sipai a zawm a, kum 38 atan hnuin 1972 khan a pension a. Sipai lumum atanga tanin Captain hial a han kai hman a ni. A chhinchhiah tlak hle.

Amah kan hriatrengna tur erawh chu Thu leh Hla lama a kuthnute kha a ni

1944 khan HMANGAIH THIAMNA tih bu a ziak a. Hei hi, relationship/sex education lam kaihhnawih a ni. Mizoin heti lam lehkhabu kan neih hmasak ber a ni a, vawiin thleng pawha heti lam lehkhabu kan la ngah lo dan ngaihtuah chuan, Capt.C. Khuma ngaihtuahna lo san hma zia leh a lo ngaihtuah thui zia a lang thei awm e.

Kan hriat lar ber Maymyo Sanapui tih hi Mizo novel zinga khawlchhut hmasa ber a ni a, a kawmah pawh lemziak a lo chuang daih tawh a, lehkhabu kawma lemziak chuanna hmasa ber a ni. Chu chu 1950 kha a ni tawh a. A chhuanawm hle a ni. A ngaihtuahna kha a advance in a ngaihsanawm hle a ni.

Maymyo Sanapui hi Maymyo Khawpui khawlaia Purcell Tower-a sanapui awm a ni a. Hei hi Gillete and Johnson Company, England a miten an san siam tlemte zinga mi a ni a, King George V a rorel kum 25 hriatrengna atana an siam a ni. Chu chu 1934 a ni a, Capt.C. Khuma kum 20 mi nia Reiek atanga Burma rama kala sipaia a tan kum a ni. Maymyo chu tunah hian hming hran a nei tawh a, Pyin Oo Lwin/Pyin U Lwin tih a ni tawh a. Mandalay bial chhunga awm a ni a. Mandalay atanga km 67 a hla a awm a ni. Ft 3510 a sang, khaw hmun mawi tak a ni a, 2014 khan mipui 255,000 an awm. British ho khawpui din a ni a. Sipai outpost atana an din a ni. 1857 Indian Revolt veteran Colonel May-a hmingchawiin Maymyo tia vuah a ni a. Burma sipai sawrkarin a hnu lamah a hming hi a thlak a ni. Burma Nipui khawpui thin a ni a. Tunah pawh hian Defense Service Academy, leh Defense service Technological Academy a la awm a ni.
Ziaktu lar Animal Farm, 1984 tihte a ziah avanga hriatlar hlawh, Eric Arthur Blair, George Orwell tih hming hmanga thuziak thin pawh kha Capt C. Khuma’n Burma a luh chhoh hma deuh hian kum engemaw zah chu Maymyo khuaah hian a khawsa thin a ni.

Capt.LT. Vuta nen, Khawtlang lunglen hla, ram awih hla leh lengzem hla 128 an la khawm a. Mizo Tlangzaibu an vuah a. Chu chu heti lam hawiah chuan a bua khawlchhuta chhuak hmasa ber a ni bawk.

I In chu ka in a ni tih a ziah chu Pathlawi leh nula hnahkhat inngaihzawn chanchin a ni a. Fahrah Nun tih a ziak bawk a. Chu chu Fahrah nun lam a thlur bingna a ni bawk.

Chhingkual Lungdi bu erawh chu a chhuah hmain a thi ta hlauh a ni.

Cancer natnain a tlak buak chho a, sipai lumum atanga Captain a kai thei, Mizo fate tana thu leh hla lama sulsutu hmasa, kawng thar sattu, pa khawhawi zau tak mai, Challiankhuma, Capt.C. Khuma tia hriat zui ni ta zel chu September 27, 1990 khan Rangoon-a ama chenna In atangin Jerusalem thar a pan ta a ni.

Hetiang khawpa pa hawi zau leh nachang hria, kawng thar sat ngam hi kan hrereng tur a ni ang. A eizawnna kawngah a chhuanawm nate, a tuina kawnga kan hnam tana rahbi thar min kaipuitu a nih theihna te hi min fuih thartu ni rawh se.

TUIPUI LEH PUTAR


May ni 4, 1953 khan Ernest Hemingway-a chuan Putlizer Prize a dawng a. Chu chu a novel pante, “The Old Man and the Sea” tih vang a ni.

He lehkhabu hi 1951 a ziah a ni a. 1952 ah tih chhuah a ni a. 1953 a Putlizer Prize dawn hnuah, Hemingway-a hian 1954 khan Nobel Prize a dawng a. A thlangtu commitee-in, Hemingway-a an thlan chhan lian tak pakhat chu, ‘The Old Man and the Sea’ novel vang hi a nih thu an sawi nghe nghe.

The Old Man and The Sea thawnthu hi han chhiar mai chuan a ho ang reng hle. Putar pakhat Santiago-a, sangha mantu hian, ni 84 chhung chu sangha pakhat mah a man thei lo a. Ni 85 naah sangha lianpui mai a man ta a. Ni 2 chhung zet mai an in chaih a. A tu zawk nge daih rei tih an intih siak a ni ber mai.

A sangha man chu a a nghakuaiin a man fuh atanga a ni thum naah, vau kam lamah a hruai kir thei chauh a. Chutah pawh shark-in an lo bei chiam a. A sangha ti ho phei chu an eizo deuh vek a. A ruhro deuh zawng chu a chan a ni ta a. An han teh chuan fit 18 zet a sei a ni nghe nghe.

He thawnthu atang hian Mihring leh nature inlaichinna te, Thalai leh kum upa chungchang te, inthian thatna chungchang te, Sakhaw lam thupuite pawh sawi kai tur a awm a. Thil langsar tak mai pakhat chu tlawm duhlohna a ni.

Ni 84 zet mai sangha pakhat mah a man thei tawh lo a, a beidawn thlak hle ang. Tuipui thuk zawkah sangha zawngin a la lut thuk sauh sauh zawk a ni. A han man ta cheng a, ni 3 leh zan thum ngawt an inhnuk leh a. Rilru leh taksa hah leh na tak a tuar phah bawk a. Shark rual a bei bawk a. Chutiang zawng zawng paltlang chuan sangha lian ropui tak a man thei a ni.

Amah Hemmingway-a ngei pawh hi The old Man and the sea a ziah hma bawr hi a nuna a vanduai lai a ni a. A thian te, WB Yeats, Maddox, F Scott Fitzgerald te hoin an thihsan chhoh bawk a, a hriselna Lamah a hniam a, Lu na, BP sang leh thil dangin a ti buai a. A thuziak lamah pawh a che tha hlei thei lo. Chutiang boruakah chuan he thawnthu hi a ziak a. A draft pawh kar riat chhung chauh a ziak a, a damchhunga a hlawhtlinna ropui ber ber chu a thawnthu pante avang hian a chang leh ta thung a ni.

Vanduai viaua kan inhriat lai pawhin, harsatna ten min tlakbuak lai pawhin, vanneihna hi kil khatah a lo awm ve reng a, kan nghah peih a, kan tawrh peih a, kan beih peih chuan, kan chantawk vanneihna leh malsawmna hi kan tawng buak theihin a awm reng a ni.

A tawrh te, a beih te peih a, kan duhthusam leh hmathlir te tih nun a, beidawn loh phawt mai tur a ni.

GENERAL ERWIN ROMMELA LEHKHABU ZIAH


German Sipai hotu ropui, General Erwin Rommel-a kha, a sipai te chauh nilo, a hmelmate pawhin an ngaihsan a ni. African Campaign-ah Bernard Montgomery-a’n a rawn hneh ta chung pawhin, a hmelmate’n an ngaihsanna kha a tlak hniam phah chuang lo a ni.

1937 khan, “Infantry attacks” tih bu a ziak a, Miliatary Tactics chungchang a ni a. Chu chu, Hitlera nena inhmelhriat tirtu a ni bawk.


Indopui Pakhatna hunlaia 1914-1918 hun chhunga Inbeihna a hmachhawn te leh chuta lehlam pawl leh an pawl te tactic chu a thlir kira, an tihsual leh tih dik zawkte leh lo ti zawk sela tha tura lang te a ziahna a ni ber a. A ngaihnawm a, a bengvarthlak a, a finthlak bawk a.

September 1918 khan, Deyfood Woods hmunah German sipaite hian bu an khuar a. 3rd Battalion ho chuan, hmun awlsam leh kal pawh nuam thlangin, Deyfood ngawpui luh chiahah tanhmun an khuar a. Chet vel chu a awlsam viau na a, French ho silai lianin an han kah tak tak chuan, nasa takin an tuar a, tam takin an thih phah a ni. 2nd Battalion ho erawh chu, Tlang cheng chhe tak karah tan hmun an khuar a.

Suahdur leh tuthlawh nen lei lai khuarin, tanhmun an khawhna tur an siam a. French hoin nasa taka an rawn kah lai pawhin, an bawkhniam daih mai a. 3rd Battalion ho angina thi pawh an awm ve mang lo a ni.

Chu chu Khawvel Indopui pahnihna laia an invenhimnaa ruahmanna an kalpui dan zing a mi a ni a. Tun nen chuan danglam tak a ni a. Rommel-an 1937 a a lehkhabu ziak a, a thlir let pawhin a danglam daih tawh a. In rem dan leh inruahman dan dang a awm daih tawh a ni. Engpawh nise, 2nd Battalion chuan, a awl sam leh hahdam zawk an zawnna avangin an tawrh phah a ni.

Mihring nunah hian, thei leh chak intih a awl a. Tunlai hunah phei chuan, mi tinin hi kan ti deuh ar vek tawh mai. Engpawh hi ti ve thei, dawl zo ve theiah kan han inngai a. Hringnun harsatna leh thil hrang hrangin min han deng tak tak a. A chang chuan, kan inngaih pawimawh angina miin min lo ngai pawimawh lo a. Kan duh ang vek hian mi hian thil an ti dawn emawni kan ti a. Engkim mai hi kan lawmna siamtu tur an ni emaw kan ti fo a. Kan tisual thin a, Kan na thin a, kan mual pho thin a. Kan ang chhuak a, kan phun a, nuihzat kan hlawh fo zawk.

Khawvel hi kan duh angina a kal lo a. Khawvel hi ding khawng tlat chunga buan hneh mai theih a ni lo a. Dak ar mai leh mi dang ngaithla leh ngaichang miah lo a, do hneh thei a ni lo. Kan tan hmun sawh ngheh a, lei laih khuar a, bawh hniam a tul hun a awm thin.

Harsatna kan tawhte, nun hahthlaka kan awm lai te hi bawhhniam remchan hun lai a ni zawk a, dingchhuak thei tura, nakina bei let leh thei tura kan invent theihna hun a ni zawk fo.

Bawh Hniam hun a awm thin.

PEARL S BUCK-I NOVEL ‘THE GOOD EARTH’


May ni 2, 1932 khan Pearl S. Buck chu, Putlizer Prize pek a ni a. Chu chu 1931 a a Novel the Good Earth vang a ni. He novel hi 1938 a Nobel Prize a dawnna chhan pawh a ni thui hle.

He novelah hian Pearl Buck Indopui pakhatna hmaa China rama chhungkaw pakhat chanchin a ziak a. Lawmman lian tham deuh deuh a la nual a. Novel ropui berte zingah chhiar tel a ni reng a. Oprah Winfrey-in Oprah Book Club a telh tur atana a thlan avangin lehkhabu hralh tla ber pawl a han ni thar leh bawk.

Broadway stage-a chan atan an siam rem a. movie atan te pawh siam a ni zui ta zel a ni.

1930 chhoa Japana nena US boruak thalo chhoah pawh Lam tang atana Chinese ho an tha tura ngaihtirtu chu he novel hi a ni.

He novelah hian Wang-Lunga te chhungkaw chanchin a tarlang a. Dinhmun hniam tak atanga an thawhrim vanga an dinchhuahna te, an tlakchhiat leh chhoh dan te.

A thawnthu hi Wang-Lunga nupui neih niin a intan a. Wang Lunga nupui Wan Lin-i chu an lhaw thenawma chhungkaw hausa zet mai, Hwang chhungkaw chhiah hlawh a ni thin a. Hwang chhungkaw ho chu an hausain an khawsa thei a. Mahse, opium ruih an chin avangte, Sum an hman thiam loh avangte, an hnathawh peih loh avangtein an lo tlachhe ta a

An sal ni thin, Wan Lini te chhungkua, taima taka hnathawka inkhawl tauh tauh thinte chu Hwang chhungkaw ram hi an leichhawn sak ta nghe nghe a ni.

Mihring hausakna hian damchhung a daih lo a. Khawvel hmun tina mihring ti chhetu hi a inanh vek mai. Ruihhlo, Sum leh pai hman thiam lohna, hnathawh peihlohna tihte hi a tel ngei ngei.

Mizo tam tak chu, Hausak hma hauhin ruihhlo te, sum leh pai hmanthiamlohna te, hnathawh peihlohna te hian min ti buai nghal pang! A manganthlak thin teh e.

Kan hnuaia awm, kan chhiahhlawh leh kan mi ngaihsan loh lohte hian min la leh pel thei a, kan dinhmun a inthlakin, kan in leh lo te pawh hi hralh ngaiin kan la awm fo.

Tumah dinhmun ngaiah kan ding reng lo. Kan dingchhuak a nih loh chuan kan tlachhia a ni mai. Taimakna leh insumtheihna hian mihring chu min lo vawng ber e.

Thunawi

Mi pahnih khat lek, taima taka ka thuziak lo chhiar ve an awm tih ka hriat avanga regular taka hetia post hi ka ni a. Chhut sual zeuh zeuh awm pawh ka siam dik hran pa peih ta thin lo a ni. Malsawmin lo awm zel rawh u.

MAY DAY


May ni 1 hi May Day tia sawi a ni a. Lawm a ni thin a. Hmanlai chuan Nothern Hemisphere lamah an kut pui a ni a. Zai leh lam leh chhang te eiin an lawm thin a ni.

Kum zabi 19-na lai khan second International an tih mai, Socialist leh communist rual khat hoin Haymarket Affair hriatrengna atan May ni khat hi International Workers’ Day atan an puang a, May Day pawh hi International Workers Day nen sawi pawlh a ni ta fo a. May Day an tih hian tunlaiah chuan International Workers Day, Khawvel kuthnathawktute Ni an sawina a nih rualin, May Day Kut hrim hrim hi chu hmanlaiin a awm hrang ve hrim hrim a ni.

May ni 4, 1886 khan Haymarket Square, Chicago, Illonois-ah Kut hnathawktu rualin nikhata darkar riat hnathawh ngiatin an nuar a. Chutah chuan buaina chhuakin Bomb te a puak a. Civil mi pali an thi a, civil mi 70 chuang an hliam a. Police pa 7 thiin, 60 an hliam bawk a. Mi 100 chuang zet man an ni bawk a ni. Hemi kut hnathawktute chunga thil thleng hriatrengnan May ni 1 ah International Workers’ Day hi hman a ni ta a ni.

International Labour Organization chuan nikhata darkar 8 hnathawh tur a nih thu hi Hours of Work (Industry) convention, 1919 hmangin an ti tlu a. 2016 thleng khat ram 196-in an nem nghet tawh a ni.

Mi zawng zawng hi officer lian leh sumdawng lian leh hlawk te, footballer leh entertainer ropuite an ni vek thei lo a. Kut Hnathawktu chi hrang hrang hi ramin a mamawh reng a. An tello chuan ram a kal tak tak thei lo. Kut Hnathawktu mimal dinhmun leh an hnathawhna dinhmun leh an hamthatna ngaihthah ram leh hnam chu a dingchhuak tak tak thei lo a, a ropui tak tak thei hek lo. A ngaihsak a, duat a, hamthatna pe tha a piang an ding chang a, an daih rei bawk a ni.

Kan hnamin kan mamawh leh kan innghahna lungpui chu kut Hnathawktute ngaihsak leh an hamthatna leh an hmalam hun venhim leh tihchangtlun sak hi a ni. Chuti a nih loh chuan, kan tlu sawp sawp tho ang.

THIH THAA DRUGS DO


I la mangang lo cheu em ni? Drugs-in kan hnam min run nasat dan hi tah ngawih ngawihna tur a ni ta!

Singapore hi an indan tirh khan Drugs in a ti buai nasa a. “Hnam tlemte mai kan ni a, heti ringawt chuan kan boral mai dawn a nih hi,” an ti a. Drugs doin hna an han thawk a, Drugs zuar chu an khaihlum hmiah mai bawk a. Drugs ti an man te pawh mumal takin a enkawlna an buatsaih a. Hma an han lak chuan Drugs harsatna pawh an hneh thei mai a ni.

An CID hnuaiah Branch hrang hrang, Gambling Branch te, Secret Societies Branch te, Anti-Vice Branch te an siam a. Heng te hian an khawtlang ti buaitu social evils hrang hrang an han beiin, an han do a, society fihlim leh him tak mai an siam thei a. Chutih rual chuan sualna a awm lo a ni hauh lo a, a awm ve reng a, chung te chu an do reng a, an police leh sawkar te an tang mar pat reng a ni. Zan reiah pawh zalen takin an khawlaiah a tei vel theih a. Nula la naupan hmel te te pawh mahniin, kekawr bul chhing tak mai hain zan rei tak takah an la vei nelh nelh thin a ni.

Mizo Thalaite hi Drugs in min tih buai thar leh zual nasat dan hi a rapthlak zawkin ka hria. Mizoramah Drugs ti an pung. Kum 15-20 Inkar ti an tam.

Khawvelah hian Drugs and arms smuggling hi sumdawnna hlawk ber a ni. Drugs zuar an tam hle. Customer an zawnna lamah Drugs zuarte hian a thlawntein an pe a, vawi thumna velah a man an dil tan a. A tum ngana tur atan chuan ruk an ruk a ngai tawh thin a ni.

Kan Thianpa pakhat, khaw pakhata zin chuan, a khaw puma intin deuh thaw chu tunah hian Drugs in a luh chhuah mek thu a sawi bawk.

Pawna CFL bulb vuah pawh zankhat pawh a awm tluan thei ta lo. Tleirawl deuh zinga drugs hluar vang hian ruk ruk a pung bawk a.

Tun hmaa an fimkhurna thin, syringe inhman tawm lohna te kha a lo ni leh tawh lo a, inhman tawmna a vanga AIDS pung ta sawt ang deuhin a thawktu zinga thenkhat pawhin an sawi bawk.

Engvanga Drugs hi lo hluar ta chiam nge tih lam chu lo dah tha ta ila, chhan hrang hrang a awm thei anga.

Tuna kan dinhmun anga a nih chuan, Generation pum hian kan in ‘HLOH” lo ang tih hi a sawi theih loh.

Hetiang ka thusawi hi hnai taka hmu tu ka ni a, mi titi sawi chhhawng ka ni lo. A veiawm ta em a, a manganthlak a. Ka han ziak chhuak a ni. Hetiang ngai pawimawha hma la thei te chuan keimahni zawn theuha hma kan lak a hun ta hle. Ziahlan atana a rem chin kan ziak langah ngaih ila, hemi ruala ngaih pawimawh awm dang, SEX chungchang te, zu ruih thlengte hian sawi kai ta rih lo ila.

Kan fate tan tia Ro sum leh In leh lo kan buaipui lai hian a RO luahtu tur ber, RO Dik tak kan fate kan ngaihthah a, kaihhruai, zilhhau leh a nawra nawr an tul hun pawha ngaih pawimawh dang kan nei a nih chuan, kan tawrh tur hi a rapthlak dawn lutuk.

Mihring dinhmun tha leh khawsak tha pangai nilo, a neilo leh a nei tlem, a rethei lam zel zinga drugs ti kan pung hi a pawi em em bawk.

Hnam tlemte kan ni a. Hetiang a nih chuan, kan ral thuai a hlauhawm hle. Mimal, chhungkua, kohhran, khawtlang, pawl, sawrkar, a hnam pumin thih thaa drugs kan do angai a ni.

Drugs zuartute hi khawtlangah engangin nge kan thlir? Dan hmanga thiam taka do let dan kan ngaihtuah tawh em? Vengchhung chanchinbuah zuar tawh lo turin kan ngen ngam em? YMA-in kan en sanin, an thlan lo laihsak tawk kan awm leh tho em? Dan zawng zawng pawisak neilotute lakah hian lo ‘mizo’ viau a tul em? An hausakna thisena lei hi engangin nge kan thlir? Zawhna pawimawh inzawh tur kan ngah viau ..

Engpawhnise, DRUGS Chu lo ti lo hram teh u. Nu leh Pa te pawh, In fa te an him em le?