PU B. KAPTHUAMA, IAS (RTD) NEN

Kan senior te, mi ropui tak tak hian beisei loh takin mi an raw be leh nawlh thin. Pu Rin Sanga IAS (Rtd) pawh hian mi rawn be nawlh tawh.

Pu B. Kapthuama, IAS (rtd) nen kan inbe teh nawlh a. Rev.C. Vanlalhruaia zara inbia kan ni mah.

Pu B. Kapthuama hi Sipai officer ni te te a ni a. An puala IAS exam an buatsaih atanga lut a ni a. Indona avanga officer indaihlohna phuhruk tura ruatte Indo zawh hnua IAS lut duhte puala exam an buatsaih sakah a ziak ve a, a tling chho ta a. Bihar cadre pek a ni! F. Rualzakhuma leh Lalhmingthanga Colney pawh ama luhdan ang thoa IAS lut hi an ni.

Pu B. Kapthuama hi Mizorama thawk miah lo a pension a ni a. Kan han inbiakna atang ngawt pawh chuan, mi inthlahrung leh inngaitlawm a nih zia a hriat chian hle! Mi ropui a ni.

Autobiography a ziak a…”He made all things beautiful” tih a ni a. A published lem lo a. Chhungkhat lainate puala a tih a ni ber a. Rev. Mahruaia kaltlangin a pdf copy ka dawng nawlh a. Mizo tawnga chhiar theiha buatsaih dan zawng teh ang kan ti a. Pu B. Kapthuama chuan a duh mai lo. A inthlahrung a ni. Zirlai nihlaia autobiography buatsaih mi thenkhatte nen chuan an inang lo teh e.

Kan han in biak takah chuan, “Tih chhuah tlak ang maw” a ti a. “Mi dangte tana chanchin tangkai a ni ang maw” a ti a. Hetiang mi ropui si, Ti khawpa a inngaitlawm hi, Lalpa hnenah a awm tawh a ni, tih a chiang hle a ni.

A chanchin a ziah pawh chu Pathian mi chanchin a ni a. Inngaihtlawmna leh takna a khat a ni. Thangtharte hian chu chu kan mamawh.

A hnenah pawh chuan ka ti a. “Ka pu, thenkhat chu an autobiography kan chhiar a. An fel lutuk a. An tling lutuk a. Mi tlin lohna sawi reng rengin phek 400 chuangte an ziak a. Kan hnamin kan thatpui chuang lo. I chanchin ang hi a ni kan mamawh” ka ti a. Keini ang naupang mai mai pawh mi tak tak cheiin min chei a. Sap tawnga a chanchin a ziah chu, Mizo Tawngin kan buatsaih anga. A bua chhutchhuah dan pawh la ngaihtuah chhoh tur a ni ang.

Pu B. Kapthuama te anga hi in thup hle mah se, kan hnamin kan mamawh a ni. A nun atang hian zirlai zir ila. Mihring hahdam zawk kan ni ang ..

Mi dangte tling lo ti reng rengin kan inkawk rei ta deuh. Chanchin mawi hi kan mamawh a ni.

Published by

admin

Ka hunawlah lehkha ka ziak thin.

2 thoughts on “PU B. KAPTHUAMA, IAS (RTD) NEN”

  1. I taima hle mai, han ti zel teh khai..Lehkha chhiar leh ziah hlutna hi thangtharte zingah a tla nasa ta lutuk hi a pawi..

Leave a Reply

Your email address will not be published. Required fields are marked *