PU C. LALNUNCHANGA (TAITEA), NOVELIST KAWMNA

C.LalnunchangaMizo Novelist zinga mi tam takin an dah san em em, a novel pahnih Pasalthate Ni hnuhnung leh Ruamrai Thuruk phei chu Mizo Novel awm tawh zawng zawng inga a tha zual pa 5-ah a tel pha ang, an tih thin ziaktu langsar, Pu Taitea kawmna ka thei hlauh mai. Ka blog atan liau liau a interview hi ka ni a. He blog hi mizo literature lam thlur bing na a nih angin, Mizo Literature chanchina Novelist hlawhtling bera chhal ngam kawmna ka han  pho chhuak e.

  1. Lehkhabu eng zat nge i ziah tawh?

—  Tihchhuah (Published Books ) tawh chu 12 a ni. Chungte chu

(1) Partei ( Pages 92 : 1999)

(2) Zuali (Pages 114 : 2004)

(3) Ka Mi Huaisen Leh Ka Pasaltha (Pages 145 : 2005)

(4) Pasalthate Ni Hnuhnung ( Pages 344 : 2006 )

(5) Ruam Rai Thuruk (Pages 470 : 2007 )

(6) Lunglenna Thawveng (Pages 278 : 2008 )

(7) Indona leh Hmangaihna (pages 261 : 2010)

(8) An Tia Lawm (Jokes Book : Pages 64, Vol I — Vol V)

(9) Deh Loh Sakei Huai (Pages 312 : 2011)

(10) Vutduk Kara Meisi (Pages 260 : 2011)

(11) Ka Pi Thawnthu Min Hrilh Chu (Pages 233 : 2012)

(12) Zoram Mi Hrangte An Vanglai (pages 293 :2013)

 

  1. Novel eng zat nge i ziah tawh? Eng eng te nge?

— Previous Works in the field of literature :

Novel                                    :                     6

Ariticle & Essay                  :                     56

History                                 :                     1

     Short Play                            :                     8

Short Story                          :                     18

     Song & Poetry                     :                     16

  1. Novel ziah nan hian engtia rei nge hun i hman?

— A inang lo khawp mai. ‘Partei’ tih leh ‘Zuali’ tih hi kum 1991 vela ka ziah kha a ni a, 1992-ah ka ziak zo va. ‘Ka Mi Huaisen leh Ka Pasaltha’ tih leh ‘Pasalthate Ni Hnuhnung’ tih hi thawnthu inzawm, thawnthu pakhat a ni a. Kum 1994-ah a ruhrel ka din a, 2000 vêlah ka zo va. Chumi kar lakah chuan ‘Ruamrai Thuruk’ tih hi kum 1996-ah ka ziak tan a, 1998-ah ka zo va. ‘Indona leh Hmangaihna’ tih hi Greek myth thawnthu awm sa novel hmanga kum 2009-a ka ziah a ni.

  1. I novel zingah hian eng nge i duh ber?

— A vai hian ka suangtuahna a ni, duh ber ka nei lo, ka duh vek.

  1. I novel-a Character te zingah tunge i duh ber? A chhan?

— Indona leh Hmangaihna tih hi Greek thawnthu awm sa ringa ziak ka ni a, mi hian an hrethiam lo fo va. Shakespeare-an history behchhanin Julius Caesar tih play-in a ziak a. Dr Laltluangliana Khiangte chuan Khuangchera leh Ropuiliani behchhanin play a ziak bawk a. Keiin Greek thawnthu behchhanin novel ka ziak a, mi hian an hrethiam lo fo va. Ka sawi tum chu Indona leh Hmangaihna tiha character-te hi a awmsa ring ka ni a. A bâk ka thawnthu danga character-te hi chu keima din vek a ni a. Duh ber ka nei chuang lo, ka ngaina vek mai.

  1. Pasalthate Ni Hnuhnung-ah khan Mizo mi huaisente chanchin i ziak a, i chawimawi hle mai a. Khatiang pasaltha thinlung ang nei khan kan ram min kaihhruai se, a danglam i ring em?

— Hei hi chu politics a ni a, heti lamah hian ka khawthlir a zau lo kawp mai.

  1. Nghalthianga nge i ngainat zawk Rotluanga?

— A hun te, a hmun te, an tlakna leilung azirtein pasalthate lo inlâr dân a inang lo va. Nghalthianga leh Rotluanga te khawvel pawh hi a danglam daih a. Ka suangtuahnaa mipa thei ber tura an character hi duang ka ni a. Ka chhanna dang ang bawkin duh zâwk ka nei lo.

  1. “Ruam Rai Thuruk” i tih tawp dan kha Zikpuii Pa “Kraws Bulah Chuan” tih khan a influence deuh lo che maw?

— Pu KC Lalvunga hi Mizo essayist leh novelist-a ka dah sân berte zinga mi a ni a, a novel, ‘Nunna Kawng Thuampuiah’ tih phei hi chu a ngaihnawmin ka dah sâng em em a. ‘Kraws Bulah Chuan’ tih pawh hi vawi hnih vawi thum vel ka chhiar chhuak a. Amaherawhchu, ‘Ruam Rai Thuruk’ tih ka ziah lai hian Pu Lalvunga lehkhabute hi ka rilruah a lo lang lo. I sawi tâkah chuan inanna chu a awm alawm, mahse min influence hran lo.

Han sawi zau ta zêl ila, Pasalthate Ni Hnuhnung tih kha kum 2000 vêlah ka peih fel thawkhat a, mahse chhuahte a lo harsa a, Publication Board tanpuinain kum 2006-ah kan chhuah thei hram a. Ka lehkhabu ka tihchhuah hnuah film lar deuh ‘300’ tih kha a lo chhuak a. Xerxes-an sipai nuai hnih leh singnga hruaiin Greece ram pum lak tumin a thawk a. Spartan lal Leonidas-an sipai zathum chauh nen Thermopylae kalkhana Xerxes-a sipaite an lo dan a, an thihchilh vek tak dân a ni a. Ka thawnthu ziah Pasalthate Ni Hnuhnug tih nen 300 kha a plot-ah inanna chen a awm a, an tawngkam hman tam tak inang deuh deuh a awm bawk a. Mahse, vannneih thlak deuhvin ‘300’ tih film aiin ka lehkhabu kha a chhuak hmasa zawk a, chuti chu ni lo se ‘300’ film kha ka la emaw ti an awm ngei ang.

Tun hnai deuhvah Warrior of The Rainbow tih film a lo chhuak leh a. Hei phei chu ka thawnthu plot nen a inang viau va, an inchei dan leh an puante kha a Mizo bawk si a. Ka thawnthu an ru ta emaw tih mai awl rum rum a ni a. Pasalthate Ni Hnuhnung tih hi Sap tawngin lo chhuak hman chu ni se, “Ka thawnthu an ru a ni,” ka ti mai awm mang e.

  1. Tunlaia kan Mizo Novel dinhmun hrim hrimah hian eng nge i sawi duh?

— Lalrammawia Ngente te, Darrokima te, Samson Thanruma te novel hi a ngaihnawm a, ziak thiam ka ti a, hma kan sâwn hlein ka hria. Chutih laiin novel thenkhat hi chu ka ziah ni ta se, ka tihchhuah ngam loh tur pawh a awm nual mai.

  1. Plot hi i dah pawimawh berin a hriat a. Settings te hi i suangtuahna atanga i din a ni berin a lang a, i va ziak fiah thiam si ve?

— Chutianga setting ziak fiah viaua min hria a nih chuan sawi tur dang vak ka hre lo, ka lawm e tih a ni mai. Plot leh character-ah hian dah pawimawh zawk ka nei chuang lo va, a pahnih hian pawimawh zawk awm thei ni pawhin ka hre lo.

  1. Novel ziah lai mek emaw, chhuak mai tur emaw I nei em?

 

— Hei, pakhat chu ka han bei tau tau zel chu a ni a.

Published by

admin

Ka hunawlah lehkha ka ziak thin.

One thought on “PU C. LALNUNCHANGA (TAITEA), NOVELIST KAWMNA”

  1. I am often blogging and i really appreciate your content. The article has really peaked my interest. I am going to bookmark your site and keep checking for new inarimftoon.

Leave a Reply

Your email address will not be published. Required fields are marked *