PU KAPKIMA SIKUL

Pu Kapkima Sikul kan ti mai thin a, Govt Middle School-1 Bilkhawthlir, kum thum ka kal a. A nuam kan va han ti thin tak.

Khatih laia kan zirtirtu tam zawk kha an pension tawh a, a then phei chuan, Lui ral min kaisan tawh a ni awm e, ka hmuhlohna leh a chin ka hriat lohna a rei tawh em mai a.

Pu Kapkima, Pu Rk Malsawma, Pi Ruati, Pu Sanghmingthanga, Pu Liantluanga , Pu Mawia , Pu Sawma te ho kha Min zirtirtu an ni a. Pi Ruati kha kum thum kan kal chhungin, vawi hnih a rai a, Hindi hi ka thiam tur angin ka thiam loh phah vek niin ka hre thin a. Chuti chung chung chuan, Hindi ziah leh chhiar kha chu ka thiam em em a, Kum tam tak a liam hnuah, NEPA a Basic Course kan training pawhin Hindi subject-ah chuan Full Mark 50-ah 49 ka la hmu pha a ni. Pi Ruati min zirtirna vang liau liau kha ni.

Pu Sanga khan English a la thin a. Grammar min han zirtir a. Board Examah Letter ka hmu pha hial nghe nghe. Pa thinchhe tak anga kan ngaih, ngainatawm fu si kha a ni a. A ngaihawm ta mai mai ngawt mai.

Pu Malsawma, kha a titi a ngaihnawm a. Bilkhawpui chanchinbu kha a enkawl pah thin a, sikulah khan a chhu fo mai a. Khatih lai atang khan thuziah ka ching tan a, thu min ziah tir a, a chhutna hmunah min awm tir ve a, a hnen atang khan thil tam ka zir a ni. A fapa Lalvena nen kan inkawm thin a. An chengkek huanah te pawh khan ka kal fo nghe nghe. “Til leh Hnap a inbuk tawk chiah” tih kha a sawi thin.

Kan Peon kha, Pu Ranga a ni a. Sipai pension, ’71 war veteran a ni. Min duat thin khawp a. Chhun chawlhah an inah min hruai a. Thingpui leh eitur min pe thin a. A sipai discipline ngai kha a vawng reng thung a. Engvanga min duhsak em em nge a nih kha ka hre lo na a, Pa fel tak chu a ni ngei e. Ka hre reng ang.

Pawl 5-ah Lalbeiseia nen kan thu dun thin a. A hnu lamah chuan, a nau Zopuia nen kan thu dun leh a, Terema kha kan tlarah a thu thin bawk a. Zopuia chu sipaiah a tang ta a, ka hmu zui ta ngai lo.

Zirtirtute khan min hrem fo. Lungawilohna leh lunglohah kan la lem lo. Min hrem zo a, min hremni a liam a, kan theih nghilh leh mai. Kan zirtirtute kha huatna kan nei lem lo a. Min hremnaah khan hremnawn nih tawhloh kan tum mai a. Kan nu leh pate pawhin min hrem tih pawh an hre ngai lem lo. Mipa fa ngang kan ni a, min han hrem ve pawh khan, a turah ngaihna chen kan nei niin kan hria. TIn, hrem han nih chhak kha pa riaua hriatna kha kan nei ve bawk a ni.

Vawikhat chu, Tuitha Venga mi niin ka hria, Valpuia khan, Lalhungchhungi lehkha a thawn tur kha min ken tir a, Mikado phekah khan a ziak a, a thlep tein, a lehkhaah tho khan a bilh lut leh tat a. Lalhungchhungi hnenah khan tha tak khan ka pe ve mai bawk a. A chhungah khan enge a ziah ang tih kha chu hre thiam mah ila, ka chhiar lem lo a. Ngawi rengin, a thawnnu kha ka pe ve mai. “A hmasaiin zing ni chhuak hi ka chibai bukna che ni sela” tih hunlai kha a ni a, khangte kha chu a ziak tel ngei ang.

Pawl 7 kan nih khan, kan zirlai kan zir zo tawh si, Revision kan nei sek a, ka ngaithla ning thin khawp a. “Ngaithla peih tawh lo in awm em, pawnah lo va break mai rawh u”, Pu Sanga khan a ti a. Lawm deuhin ka chhuak a. Pu Sawma Craft Teacher khan min lo hmu a, Thingzai pu tura kal tur kha a ni a. Phur fein ka zui ta a. Vengchep leh Dawrveng inrinna lai vela Thingzai khawl nei teinah kan han kal a. Anni kha an hming ka hre tawh lo. Kan han pu vang vang a ni.

Zirtawpni tlai a piang khan Game period a ni a, kan inkhel tak tak ziah a, a nuam kan va han ti tak. GSA khan, Sub Junior tournament a siam thin a. kan team Halkey Football Club kha kan chhuak ve thin. Bilkhawthlir Police Outpost a 2 OC Pu Zuia, ASI khan kan senso tur te kha min tum sak thin. Jersey sen kan ha thin a, khawia mi nge mawni kan hawh thin kha ni.

Hnathawhni kha a awm a, hna kha kan thawk tak tak thin a, lehkha zir ai khan a nuam fe zawk reng bawk a. Kan Sikul kha tlangah a awm a. A hnuai kha Bilkhawthlir Playground kha a ni nghal a. Game Ni te, Hnathawhni te khan, kan inkhel tak tak a, hna kan thawk tak tak bawk. Khangte kha kan thanchhoh zelnaa kawng pawimawh tak a lo ni reng mai.

Pawl rualpuitea a naupang pawl kha kan ni thin a. A kum ang zawng phei chuan, ka lo naupang ber hial thin angem aw, te ka ti leh ta mai mai. Kan pawl rualpui emaw, kan chung chiah te emaw kha chu an nulain, an tlangval riau khan ka hre mai thin a. Football Tournament khelh ni khua pawha Senior teama tel pha kha an ni nawk thin.

Tam tak kha chuan, ngaihzawng an nei tawh a. A hunlai thlir let khan,a awm lohna em em pawh a awm chuang lo a. Tleirawl chho uk uk kha an ni tawh thin a. A ngaihna hre ve chiah lo tawk kha kan lo tei ve mai mai bawk a.

Mi aiawha rawn kal thin, U Mapiana kha a fel thin khawp a. thil min tihpui peih a, a taima si a. Sikul chawlhah te khan a inhlawhnaah min hruai a. Chhang ur te khan a inhlawh pah a. kan kal ve zel a. Chhang urnaah khan cheng 5 vel hlawh te khan eng engemawni kha kan va ti ve thin a ni.

Kan Hindi Zirtirtu Pi Ruati te huanah Kuhva tla kan chhar thin a. Anmahni vek khan min leisak leh a. Pathum cheng khatin ni tain ka hria, min leisak thin kha. Mahni duhzawng engemaw leina khawp kha chu, kuhva chhar te, Tuichawite khan kan inhlawh thin a. Pu Ruati bawk khan kan tuichawi te kha a lei a. Ka ngaihtuah let a. Khang zawng zawng kha a mamawhna awm reng reng hi ka hre ta hauh lo. Mi Naupang mai kha kan ni a, hnathawha hlawh neihna tur kha min siam sak thin a ni ta maiin ka hria.

Kan headmaster Pu kapkima te khan lehkhabu an nei teuh mai a. An inah min hruai a. Min chhiar tir thin a. A Nupui, Nu Engtei lehkhabu, MnB zawng zawng nen khan ka chhiar a.

Ka sikul kalpui thin, ka classmate te, classmate chiah lo, a hunlaia kal ve thin te kha engtin awm ta zel ang maw. A lo rei ve ta. Kan sikul te, Bilkhawthlir te, khang hunlaia ka thiante kha ka hmuhlohna a lo rei ta e.

Hetiang thilte hi, ka hriatna ata an kalbo mai lohna atana ziakin ka han dahtha a nih hi. Nakinah ka faten kan sikul kallai chanchin hi an lo la hriat ve nan.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *