RAM ENGMAWI TAK CHU A AWM

Ramhnuaiah chuan senator dinhmun te hial a han chelh pha a. Lehkha thiam a ni bawk a, zalenna sualtute zingah pawh a langsar hle. Rambuai vanglai tak, 1969 kha a ni a, Vanmawia chu ramhnuaia an awmlai chuan namen loin a damlo ta a. Thihna kut chuan a ban duau duau reng a ni mai e. A naute hnena a thuchahah pawh, “Kan rethei em a, ka thih pawhin ka thawmhnaw chu la ula, ka ruang chu in kalsan dawn nia” a ti hial a. Thi leh dam inkara a awm reng lai hian, Lalpa khawngaihna chu a chungah a lo eng a, Chatuan chawlhna hmun ropui ber, ram ni eng mawi tak chu thlarau mitin fiah tak hmuh tirin a awm a.
Hemi hnu hian mak tak main a lo dam chhuak leh a, Mizo hlapui hmingthang, Kristian hla ropui tak, “Ram engmawi tak chu a awm” tih chu a phuah ta a ni. Chu chu 1969 khan a ni a, ramhnuaiah a la awm lai a ni.
KTP General Conference-ah Diamond Jubilee Zaipawl hla sak tur pakhat zawk kha a ni.


Pu Chawngbuaia leh Pi Zakhumi fapa Vanmawia hi kum 1922 khan Saichal khuah a piang a. Mi lehkha thiam tak a ni a; kum 1933-ah Lower Primary Exam-ah Mizorama pakhatna a ni. Kum 1963-ah B.A. Distinction-ah a passed.
An chhungkua hi zai ngaina em em mai an ni a, an inah hian tlangval rualin messiah hlapui an sa tthuai thuai thin a. Chuta tang chuan rimwi lama tuina a nei ta niin a lang. A hlapui kalphung pawh hi a changkang viau a ni. A lehlin te nen, hlapui 14 kutchhuak a nei nia hriat a ni. Zai chu a thiam lutuk lo a, solfa thiam thuah erawh chuan a hunlaia mizo zingah chuan a thiam ber pawl a ni ang an ti thin.
Kum 15 chhung Air Force-ah a tang a. Aizawl D.C.-ah te, Development Branch leh High School-ahte Clerk hna a thawk a. MNF-a tangin, Senator hna a chelh bawk. Kohhran Zai Pawl hruaitu tha tak a nih bakah, Thalai Pawl Conference hla bu buatsaihna kawnga sul sutu a ni.
A hla lehlin, hlapui Double chorus A vantirhkohte chu a pe anga, tih saitual thalai mi 200 zetin 1947 Phulpui Presbytery-a an han sa chu ropuui an ti hle a ni. Tunlai hunah awh kohhran zaipawl member 200 chu ropui tak a la ni. A hla lehlin dang pakhat, Lalpa ropui ber engkim siamtu hi hla tha tak a ni bawk.

Tuikual Kohhranah Tuikual Bial zaipawl puiin Ka pa thlahnan he hla hi an sa a, khatiang tluka zaipawl mawi leh ropui kha Kan buaina kan chawlhsan hunah chauh ka ngaithla tawhin ka inring hial. A hnu lawkah senior Inkhawmpui hla a nih avangin Senior Department te ka zirtir chhuak ve leh vek bawk a.

Aw lo kal ula nangni,
Hnam tinrenga mite u,
Khawvel thilte kalsan in,
Kan Lalpa rawng chauh i bawl ang u
tia Zai Pawl Hla buatsaihtu Vanmawia hi; van ropuina chang turin, February 23,1980 khan zan awm tawh lohna hmunah, A Pa in nuamah chuan a kal a. “Ka chatuanin ka thlen hunah chuan, ka buaina zawng ka kalsan tawh ang” titu chu Chhinga Veng Thlanmualah vui liam a ni.

He ka zinna thlaler ram hi
Ka pel thuai dawn
Ka Pa in nuamah chuan
Ka pa in nuamah kumkhuain
Hlim tawp hlauloa cheng turin

Published by

admin

Ka hunawlah lehkha ka ziak thin.

One thought on “RAM ENGMAWI TAK CHU A AWM”

Leave a Reply

Your email address will not be published. Required fields are marked *