REV CHUAUTERA KAIHTHAWH LEHNA

John Bunyana lehkhabu ropui “Kristiana Vanram kawngzawh” Mizo Tawnga a lehlin avang ringawt pawha kan hriatreng tur, Chautera kha Zoram Baptist Kohhran Pastor hmasa ber a ni a. Saptawng leh Mizo Tawng thiam tak, Bible lehlinna kawnga thawhhlawk tak leh kohhran pa a tling a ni.

1901 Chhiarpui dawn khan, sorkar tanpuitu atan ziak leh chhiar an zir luih tir a. Chumi atanga kum 10-naah Kristiana Vanram kawngzawh chu Mizo Tawngin a letling a. Chutih lai chuan kum 21 mi chauh a ni. Tunlai thleng pawhin lehkhabu lehlin tha a tling. A mizo tawng a mawi em em a, hmun hming lah a vuah thiam narawh!

Pathian thu thiam a ni a. A sawi thiam bawk a. Kohhran buaia hmatheh atana an hman reng thin a ni. Zosapte thachhang dawltu ber a ni a. Secretary tha a ni a. Zosapte pawhin “A bu ang thlap a ni,” an ti thin.

Bible lehlin kawngah a thawhhlawk thu kan sawi tawh a. Pu Buanga nen khan an thawk dun thin a. Amaha a lehlin ngawt pawh hi, Leveticus, Numbers, Deuteronomy, Samuela I, II, Nehemia, Ezra, Thufingte leh Estheri bute hi a ni.

Kristiana Vanram kawngzawh a lehlin bakah hian, Kristian Thurin, Pathian Thusawi dan, Baptisma Zawnna, Rawngbawltute tana inkhawm ho dan, Thlarau Thianghlim hnathawh leh Rom hrilfiahna a ziak a. Upa C Saizawna nen, Khawvel mihring lo dinchhuah dan, tih bu an buatsaih bawk.

A hming diktak chu Chuaukunga a ni tak nain, a nausen laia an uipui mit na (mit terh) chu a ma chhawnchhiahnan tak an hmang thin a. Chuautera a ni hlen ta a ni.

Kum 40 zet pastor hna a thawh hnuin 1954 kha a pension a. Kum 1959-a Aizawla inkhawmpuia a kal chu, a nuam lo tan a. Kum 1960 september ni 4 khan a taka Lalpa kianga thu turin a haw ta a ni.

Chhimbial kohhran pastor hmasa ber, kohhran ho leh Mizo hnam tana mi hlu tak hi a chanchin hi kan hre tawk ta lo hle a, a chanchin hi ka han sawi thar leh a ni e.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *