SUPERMEN

July 23 atanga ni 25, 2015 chhung khan Documentary Films Festival kan nei a. Chawhnu dar 2 atang zan dar 7 thleng film kan en hoin kan sawi ho a. Skype kal tlangin Director te nen kan inkawm bawk a. Nikhata film 8 vel zet kan en thin a. Ni 24 July, 2015-a, a hnuhnung bera kan en chu Supermen of Malegaon tih a ni. Kan nui nasa hle.

Lehkhathiam sang lo, puan tahna hmuna thawk ten film an siam ve thu a ni ber. Kan en nual tawh awm e.

An nun a harsain a hau tak a. Ei leh bar zawn chu an tan a khirha, chuti chung chuan rim taka an thawh angai a, rim taka thawk chung chuan chhungkaw chawmna khawp an thawk chhuak pha meuh lo.

Chutiang dinhmun harsaa ding chung chuan an vui hauh lo a. An hlimna khawp chu an hmu ve zel a ni. Film an tui em em a, an siam ve ta hial a. An ngaihtuahna a thain an creative hle.

Filma changtute kha an va hlim teh lul em! A phur lah an phur. An han siam zo, an han chhuah turte kha an tap lo chauh a ni.

Mi tam tak chuan thil reng reng hi sum leh pai leh material thila hlawkna tur zawngin kan thlir vek a. Chu chu mi dang kan tehna pawh a ni. Mahse, Chutiang chu hlimna a ni si lo.

Mahni tui zawng tak, mahni nuam tih zawng tiha, chumia lawmna kan neih chu hlimna min petu a lo ni zawk. Malegaon khuaa mite hian sum leh paiin a pek theih chu an nei lo, sum leh paiin a lei theih loh erawh an ngah a ni.

Khawvelah hian retheihna leh harsatnain tuam vel mah se, huaisen taka nitin nun hmachhawn a, hlim taka hun hman dan thiam te hi Supermen chu an lo ni e.

Malegaon mite hlimna hi Hollywood a film ropui siamtute pawisa hlawh chhuah hian a lei pha lo ang. A Superman a ber Shafiga kha a channa hmu hman loin cancer-in a thi zui ta mai leh nghal.

Mizo te pawh hian kan thil ngaihtuah dan phung hi a dik chiah em tih kan ennawn a hun viauin ka hria…

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *