‘TAKE ME HOME, COUNTRY ROAD’ hla leh a behbawm

countryJohn Denver tih hming hi khawthlang pa ho hmingah chuan keini hoin kan hriat lar ber pawl a ni awm e. Engnge a tih thin tihte pawh han hrilhfiah ngial ngai khawp chu kan tlem pharhin a rinawm. Amah tak hi chu zaia a lo chawi thin Lei mawina te hmu theiin awm tawh lo mah se, a hlate chuan khawvel ala awi zel a. ‘Leavin’ on a jet plane’ te, ‘Good to be back home again’ te, ‘Annie’s song’ te chuan mite ala awi zel a. ‘Take me home country roads’ tih angte phei hi chu kan lo zawm ve thei deuh vek awm e.

denverHe hla ‘Take me home, country roads’  ka ngaihthlak apiang hian Mizoram atanga Shillong panna kawng, Jowai pelh hnu, Shillong area luh hma  deuh, night bus-a han kal a, zing khaw en rual vela kan thlen tawk vel, zing khawthiang tak hnuaia hawi nuam tawk vela kan tlan na thin tlangpui kawng ngil em em mai, kawng sira limestone laihchhuah bang nawi ni awm tak lo awmna, tlang ni chiah lo bawk hniam te te, far thing din pheuh pheuhna lai vel khu ka hre chhuak ziah thin a. Ka rilru chuan, ‘He ram hi ram vannei a ni, a chhunga chengte hian an zir tawk lo deuh emaw ni chu aw’ ka ti fo thin.

Khawthlang nula zaithiam, a hmel ka lung  tileng em em thintu, ‘Olivia Newton John’ pawhin he hla hming thang tak mai hi a sa ve bawk a. Barapani lui kamah Rudolf-a quarter, Dr. Taylor-a hmun hluiah Nepuni-a te nen zan thla eng hnuaiah kan ngaithla thin.

danoff‘Take me Home, Country Roads’ tih hi John Denver, Bill Danoff leh Taffy Nivert te phuah a ni a. An phuah chhuah tirh hian John Denver hi a tel ve lo. 1970 December thla khan lirtheia a chetsual avangin John Denver chuan a kut zungpui a ti na a. In lamah a inenkawl a. Hemi tum hian Bill Danoff leh Taffy Nivert te nupa  chuan an va kan a. Danoff leh Nivert te chuan thla khat lai an lo buaipui tawh, an hla phuah mek chungchang chu John Denver-a bulah chuan an sawi lang a. Danoff leh Nivert-i te hian Denver hi an zaipui thin a ni. Lirtheia a chetsual hmalawk, 1970 krismas dawnah pawh khan John Denver-a zaina pakhat Washington-ah chuan an zai ve nghe nghe a ni. Bill Danoff hi ama enkawl D.C. Restaurant-ah zirtawp zan hun thlan bikah tunlai thleng hian a la zai a ni.

taffy nivertDanoff- te nupain he hla an phuah tanna chu Maryland bul lawka Nivert-i chhungte chenna hmunah chhungkaw inhmuh khawm an neih tumin a ni a. An kal kawng chu kawng zimte a ni a, thlifim a thaw heuh heuh a. Chumi behchhan chuan hun khawhralnan motor chhungah chuan Danoff chuan ballad a ziak a. A hla thu ziah chhuah hi a hnu deuhah, an thianpa lemziak thiam, a lehkhathawn a pianga West Virginia ram engmawi tak chanchin ziak ziah thin thu ziah thin mil turin an siam rem leh a ni.

A tira an hlaphuaha chang hnihnaah chuan a hunlaia mite  duh loh zawng deuh hla thute a awm a. ‘Nula saruak’ tihte a awm deuh nuaih a vangin han record chiah pawh nise Radio-ah phei chuan an zai tir duh ngaiin an ring lo reng reng a. John Denver-a’n a han sak chhuah pawh khan a sa tel ta lo reng a ni. Scottish zaithiam leh mi chawkhlim thiam, musician tha tak mai ni bawk Andy Stewart erawh kha chuan ‘West Virginia’ hla hi phuah a nih tirha a thu an g chiah chiah khan a sa a. A chang hnihna an phuah tute’n an chawi lar duh lem loh pawh, ama album ‘My Homeland’ -ah a nihna ang angin a sa chhuak a ni.

He a chang hnihna an paih leh tak hi Danoff chuan tun hnu hian ama website-ah a rawn tarlang a. A hla thu chu hei hi a ni:-

In the foothills hidin’ from the clouds,
Pink and purple, West Virginia farmhouse.
Naked ladies, men who looked like Christ,
And a dog named Pancho, nibbling on the rice, tih hi. Tun lai hun chu nise an paih kher ange maw?

Dam samlo Denver-a bulah chuan an hla gte chu an han pharh a, Danoff a te nupa chuan an han sa ta a. An tui khawp mai a. Zing dar 6:00 thleng rakin an pathum chuan an inkawm ho a. Hla thute chu an siam thain an siam rem a. A tlarte an thlak thleng bawk a. An tuai hnum zawh chuan Denver chuan chu an hla thar chu a album siam leh  hmasak berah a telh dawn tih a thiante chu a hrilh nghe nghe.

December 30, 1970-khan Denver-a chuan a accident hnua a  concert hmasa ber chu a nei a. A hla sak tur ho a sak zawh hnu chuan Encore mipuiin an beisei a, hla hran han sak mai tur  neih loh avang chuan a hla nihphung an la siam zawh loh, ‘country Roads’ hla thu inziahna, a iptea  a ah, lehkha them zawr tak chu a phawrh a, mipui hriatah chuan a chhair chhuak ta a.Hla thu a chhiar zawh meuh chuan mipui chuan Denver-a chu Standing Oviation minute nga chhung an pe a. Cellar Door History-a Standing Oviation rei ber zinga sawi a ni nghe nghe. January, 1971 khan New York khawpuiah an record ta nghe nghe a ni.

1971 Favang khan John Denver chuan a album hming thang tak, ‘Poems, Prayers and Promises’ tih chu a ti chhuak a. He album-ah hian a hla hmingthang bera chhal ngam hial tur, ‘Take me home, Country Roads’ tih hi a telh ve a. A kum leh, 1972 vel atangin a lar tan chauh thung. A tih chhuah tirh atanga kar engemaw zat hnuah RCA chuan John denver-a hnenah a single (take me home country roads)-ah chuan beisei an nei lo a, thlauhthlak mai tha a an hriat thu an hrilh a. Ani erawh chuan, RCA hnenah chuan ‘Thlauhthla miah suh u, in beisei aiin a ropui ang’ a lo ti thung a. Denver-a thu chu an awih a, an ti fuh hle! 1972 August ni 18 chuan ‘Take me home, Country roads’ single ringawt pawh chu maktaduaih chuang an hrlah chhuak a ni.

‘West Virginia’ rama kal chakna thu sawi chhuahna a ni tih kan hria a. He hla hian ‘West Virginia’ a chawimawi hle.West Virginia hi US khawchhak lam lailia awm a ni a. 62,760 sq.km chauha zau a ni a. Cherookee Indian ho khawsak thinna hmun a ni. Ohio luipui a luang tlang a. Potomac luipui te pawh a luangin, Appalachian Mountain chu he ram chhung thoa awm hi a ni. 1863 khan US ram chhungah rin luh a ni a, US state 35-na  a ni.A khawpui chu Charleston a ni. Pensylvania-in hmar lamah a ri a, khawchhak lamah Maryland leh Virginia-in a ri a, chhimthlang lamah Kentucky a awm a, hmarthlang lamah Ohio ram a awm bawk.

Rokunga’n Mizoram, ‘ Chhawrpial Run i iang e’ a tih ang chiah khan, Danoff te hian West Virginia an chawimawi a.West Virginia mite pawhin he hla hi an ngai ropui hle  a ni.West Virginia House of Delegetes leh Senate pawhin an state hla hman mek chu, ‘Take me home, Country roads’ tih hian thlak tumin dan siam turin an thukhawm tlang fo thin. An la remti tlang lo mai mai pawh a.

He hla hi West Virginia University hlapui a ni a.Home football an khelh apiangin, inkhelh hmaa an show neih thin apiangah 1972 atang khan Mountaineer Field-ah an la sa ziah a ni. 1980 khan Denver chuan he stadium khat tlata kalkhawm Mountaineer fan te hmaah a sa a. Hemi tum hian Mountaineer field hlanna inkhawm hi an hmang a. Hei hi Coach ropui Don Nehlen-a’n WVU FootballTeam a enkawl hnua  inkhelh a hmachhawn hmasak ber tum a ni nghe nghe. Athletics Event zawng zawng deuh thawha he hla hi an sa a, University Function pawimawh chinah chuan an sa vek a ni. An football team leh West Virginia University mipa basketball team te an chak apiangin he hla hi an sa ziah thin a ni.

He hla thua ram leilung pianhmnag leh awm dan an tarlang langsar zet mai pahnih- Shenandoah luipui leh Blue Rigde tlang ram te hi West Virginia State nen an inzawm dan hi a pawnlawi hle a. Virginia hla nise a inhmeh mah mah zawk hial ang.

Radio-a Nivert-i an kawm tum chuan, ‘Country Roads’ phuah tirtu kawnga ber chu West Virginia nena inhlat hlein a sawi. A chenna Washington D.C. lam a hnaih zawk a. Montgomery County, Maryland bul lawkah he kawng hi a awm a, Denver pawhin a tlawh fo thin.Country Road an phuahna chhan ber kawng, Clopper Road hi tun thlengin a la awm a.A ram leilung erawh chu tunhma thingtlang hmun mawi tak leh lungti leng em em thin nen chuan danglam tawh tak a ni. Khawvel hmasawnna hian thil hlu tam tak a ti chhe thin a. Ram hmunhma mawi tak kan lai chhia a, thing hmun duhawm tak te hmasawnna chang chawiin kan thiat a. He kawng pawh hian chu’ng chu a tuar ve a. Mihring nun chu a a zalen phah sawt chuang lo. Hmasawnna hian rilru lama ti tawt sawt thin em tihte hi inzawh fo a tul a ni? Thu uar lutuk kan ni kher lo ang- hmasawnna changchawiin keimahni chhiatna ngei hi kan insiam chawp a ni! tiin sawi ila. Clopper Road hi Gaithersburg, Maryland atangin a intan a. Tunhma chuan lane khat chauh a ni thin a, tunah chuan Motor pali thawl takin a inpel zung zung thei tawh. German Town ava pawh a, Country Road chu a ni tawh lo chiang hle.

Kum 1995-a tih chhuah, Japanese animated Film ‘Whisper of the Heart’ tih, Hayao Miyazaki leh Studio Gibli te siam kha Country Roads hla thu behchhana thawnthu siam a ni. Zaithiam ropui, ray Charles pawh khan he hla hi a sa ve nghe nghe a, 2002-a a Album tih chhuah ‘Ray Charles Sings for America’ tihah kha a tel ve a ni. Aleksander Melek pawhin Slovene tawngin he hla hi a sa a. A hla thupui chu Siva Piot (The Gray Path) tia thlak a ni a, West Virginia aiah chuan Slovenia ram bial pakhat, Gorenjska chu zaia chawi a ni thung. Toots and the Maytals te pawhin he hla hi Reggae-in an sa a, ‘Almost Heaven, West Jamaica’ an ti thung. Doug.E.Fresh-a’n a siam dang lam a, Rap nen a chawh pawlh a. New York Knicks in an mahni khelmuala an inkhel dawn a piangah leh, TV-a an team fakna  alan dawn apiangin zai tir a ni thin a, a hla thu hi a remchang lai laiah siam danglam a ni thung.

John Denver-an he hla a record lai khan West Virginia ram hi a la hmu ngai miah lo a. Bill Danoff leh Taffy Nivert te pawhin he hla an phuah lai hian an la hmu ngai miah lo bawk.Hetih lai vel hi anni pahnih  inneih lai a ni.

He hla phuahtu-a John Denver sawi tel a nih ve thinna chhan chu, a hnena Country Roads hla an en tir tum khan, mumal taka phuah zawh a la ni lo a, phuah zawhnaah a puih nasat em avangin a hming hi an sawi tel ve thin ta chauh a ni. He hla hi John Denver-a hla hit puitham hmasa ber a ni a. 1998 khan ‘Take Me Home Country Roads’ vang hian John Denver hian, ‘Grammy Hall of Fame Award’ a dawng a ni.

He hla phuahtute hian West Virginia hi an phuah hun lai hian an la hmu ngai bik lo a. Chuti chung chuan West Virginia ram chu ropui takin an chawimawi a ni. Leilung mawi ti thin, khawvel hmasawnnain a la khawih chingpen ve loh, khuarel mawi taka la hmina hmuna khawsa te; khawpuia khawsa si, an ngaihtuahna tea hmun hring dup hmun ngiahtuah thin tute chuan he hla hi an ngaihthlak apiangin an lunga  leng thin ngei ang! John Denver-a pawh hi a hla tea leilung mawin aleh khuarel duhawmna a cheimawi thiam em thin avangin mite’n an ngaina thin hle!

He hla hi CMT-in kum 2003-a ‘Country  hla ropui  za’ an thlan zingah sawmpariatna  a ni.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *