THAWNTHU HLUI

If a writer falls in love with you, you can never die…

Thuhawnna:- Vl Zuithanga’n “Ka thianpa, Hmangaihna a khat” min tih kha ka ni ve ngat a, hmangaihna hlir hian ka khat lah tak a. Hmangaihna kaihhnawih a bu a lo ziak tawh kha ka ni ve ngat reng a. Tunlai FB tawngkam takin, Feeling Love tak ka ni!

Thu hlui ka phawrh zauh zauh a, a thar ziak turin ka taima rih lo a, rilru ka pe peih vak rihlo a, a hlui her lum leh mai ila, a hlui tak tak chuang lawg nge.

Hmanah Chuan:-

Pachhunga College -ah a ni a. CR kan thlang dawn a. Zirlai zali chuang zet mai kha room chhungah kan thu dul a, Hnung deuhah keini kha kan thu a. Ka bulah chuan Op-i te an thu a. Op-i bula kan awm hnaih chuan VL Zuithanga chu a hla lo hle dawn tihna a ni bawk. ACR tur atan hmeichhia panga nomination an han siam a. Laltlanmawii tih chu a hnung berah a lo lut a. Hmeichhe lian lutuk lo, ngo lam aia hang lek lek lam a ni a. A lo luh hma chuan Opi chuan Laltlanmawii chu a hmeltha reuh lutuk a ti a, ka la hmu ngai lo a. A lo lut a, a hmeltha reuh lah tak a. NCC form a ha a, a inhmeh leh hmeh loh ka hrethiam chiah lo a, a inhmeh lo lutuk chu a ni awmlo awm e. Vote kan han thlak a. Amah chu ka vote awm pawh ka hre chuang lo a. Result an han puang a, ACR pawh chu a ni ta lo a, tunge ACR ber kha ka hrechhuak zo tawh lo.

Chuti chuan, Nitin maiin Class kan kal a, college veng kan chhuk thla ngar ngar a. Kan thlan vek thin! Nitin maiin T-Shirt dum leh Jeans kekawr pawl ka ha a. Chutih lai chuan kan class (kan honours-ah) thian pawimawh deuh ka chhar a. kan inkawm ngeih hle, Engkim kan in share a, zantin deuh thaw ka in bia a. Kumthum chhung chuan ani nen khan kan va in zui nasain, kan va inbe nasa tak em! In ngaizawng awm tak kan ni a, kan inngaizawng miah lo a. Nunah hian Ngaihthah loh tur thenkhat kan ngaithah fo zawk a nih hmel e ka ti ta. Vl Zuithanga pawhin a ti!

Tlani chu ka ngaihsak zui em em lo a. Ka lo theih nghilh leh deuh tawh zawk emaw ni. Nilo, theih nghilh chu ka theih nghilh lo. CR thlan hnu khan hmeichhe lam kha kan melh lutuk lo a, garage sirah leh Bill tree buk hnuaiah khan kan inhnial miah miah thin avang khan thil dang chu kan lo ngaihsak vaklo a ni zawk awm e. Ring deuh deuhin kan zai a, Lawmsiamkima kan bass tir thin bawk, kan zak lem lo a!

Thla thum hnu vel chuan October thlaah NCC ho an camp dawn a, Luangmualah. Tlai banah hian an camp na lam tur chu an pan dawn a. Bus a chuangte chu ka han en chuan a hnuhnung ber dawttuah chuan tukverh bula ACR tling zo ta lo kha a lo thu a. College veng mah ni se boruak a nuam tan tawh a. October thla tlai lam hi chu a mawi thin reng reng a. Ni tlak hnai tawh tak eng lam sut tawh chuan a biangah a chhun a, Bus tukverh chu a nam tawlh a, pawn lam a lo hawi a. Mi pakhat hian a hmingin a ko vak a. A nui var var a. Mi hmu ve pawhin ka ring chiah lo. An chuanna Bus chu a rum vang vang a. Bus lian zet mai hi a ni a, college compound atang chuan a tlanchhuak ta ruau ruau a…

Chumi kum chuan kan vei zui em em pawh ka hrelo a, subject tinrenga kan inhnial chhung khan kum a vei a. VL Zuithanga erawh chuan di chambawihpui tih a ziak a. Chu chuan thui a thlenpui erawh chu ka hre chuang hlei lo a. Hmeichhe thinlung chhung hi hmu thei ila chu danglam erawh chu a lo siam mai thei a. B.A kumhnihna kan han lut chho a. Kei hi, a harh a harh ta ngang ka ni a, ka thawmhnaw hak ngai hlir ka hak bawk avangin min hre leh deuh vek tawh a. Vl Zuithanga’n Class chanchinbu “Bill Tree” a en kawl a, chutah chuan thu hrang hrangte kan thai kur ve ngiau nguai a. Ani nen hian kan inchem chhe kawp deuh chawt reng a ni mai a. Ngunlinga Bualpui khaw tlangval dangte kha kan ti ti karah an lo tla lut ve hrim a, Mizo literature zir an ni hlawm a, class karlakah te, a chang chuan class attend miahlo tein ring deuh deuhin kan inhnial a, class chhungah te an lo zu sawi chhunzawm a.

Bill tree hnuaiah chuan thuthleng a awm a. kan lak belh bawk a. Chutah te chuan chhun pachangah mi vei huai huaina karah te chuan kan lo mu leh tual mai thin a. Mu chungin kan tawng zuah zuah a. lecturer lo kalphei te chuan kan mu lai chu min rawn be ve mai a. MU chung chuan en mang hleilo te chuan kan lo chhang liam ta mai mai zel a. Tumkhat chu October thla hian, thil danglam deuh kan ngaihtuah a. Acrostic poem Tlani min duh em? tih ka phuah anga, chu chu i chhuah ngam angem ka ti a. ZUia lah chuan ngam teh reng mai a ti a. Bill Tree Issue thar berah chuan kan ti chhuak ta pek a. College a deng chhuak hneh teh a sin. Chumi tum bill tree issue pawh chu a zo vek a. science lam hote, Arts lam hote chuan, “I va pa ve!” an ti deuh nak nak a.

TLANI 3

Acrostic poem tihchhuah hnu kha chuan, ami en dan kha chu a dang ve deuhin ka hre ta a. ka ngaihbel te pawh a ni mai thei a. Mi chuan min fiam luai luai a, engvakah mah ka ngai lem lo a. A thiannu pakhat nen Education class-ah kan thu dun a, “I thil ziah kha i ti tak tak em ni?” a ti a. Ka nui ringawt a, engtin mah ka chhang lo a, “Aw ti ila” engtinnge a tih ang tih hi ka ngaihtuah fo mai. A hnu lamah pawh Tlani chu kan bulah te chuan a awm ve zauh zauh a. Hemant-a nen tumkhat chu Cricket chungchang kan sawi dun a, Ngawi reng hian a lo thu ve a. Rei deuh hnua chuan, nui var var hian, “In van sawi tui em em…Ngaihnawm khawpin in titi a lawm maw le” a tia, ka nuih a za angreng khawp mai a.

Hemi kum hian Literature Club hoin lehkhabu an ti chhuak a, Hla phuahthiam Lalmama’n article ziak ve rawh mi ti tlat a. han ziah mai tur ka hre lo a. Political science class-ah, sanghmingthanga class-ah a hnung berah VL Zuithanga nen kan thu dun a, Sanghmingthanga thil sawi chu ngaihnawm ka ti loh lutuk avangin, “TLANI 2 (when you love some one)” tih chu ka ziak ta ngawt a. Phek hnih vel ka ziak a. Class ban chuan, Lalmama chu ka pe mai a. Anni pawh chuan an lehkhabuah pawh an lo ti chhuak ve mai bawk a.

Chutiang chuan 2nd Year pawh chu kan hmang ral leh a ni mai a, kan zia angai reng a. First Year-a ka chhar thar ka tih, kan class ami nen chuan nitin kan la inzui reng a, achang leh, UCC-a ka kal lai chanchin sawi rawh min ti a, tutute emaw chanchin te min zawt a. Selection test dawn te, exam dawn apiangte chuan mi rawn call-a, thil hrang hrang kan sawi dun a, rei deuh kan inbe ziah a. Tumkhat pawh, College gate bula kan ding dun chu, kan thian pakhat hian “nangni pahnih hi ni rawh u, in sawi pawp law law teh u” a rawn ti hlawl mai a. Ani chuan, “Mi dang mi dang a ti kual a, keini te chu kan lang phalo a lawm” a lo ti mai a. Engmah sawina chang ka hre pek lo a.

Chutiang chuan kum kan hmang ral a. 3rd year kan lo kai chho ta a. Khatih lai khan Tlani khan ngaihzawng a nei thoin ka hria, ka hre chiang ta chiah lo. Lehkha huaisar tak te kha ziakin, hla tumtlang takte kha phuah mah ila, chuti em em chuan ka lo ngaihven em em chuang lo ni te khan ka hria. Kan hlim tawk em em a, thil dang kan ngaihven vaklo te pawh a ni mahna. Vl Zuithanga erawhin Op-i a la vei zui reng a. Zankhat phei chu an ina lo zu len te pawh a tum nghe nghein ka hria.

TLANI 4
3rd Year kan han lut chho a. Tlani kan hmuh tirha ka thawmhnaw ngai kha ka la ha a. Ka bag ngai ka la ak a, ka pheikhawk ngai, Outlook company atanga ka dawn, Adidas phei khawk var kha ka la bun reng a. Nun dan danglam teh chiam kan nei lo a. Summer Hut chu 3rd year ho awmna tur a nih zawk laiin Bill tree hnuaiah kan awm tam zawk a. Hetih lai hian Zolife chanchinbu ka en kawl pah a. VL Zuithanga’n min pui ve reng a. Zan khat pawh kan inah a rawn riak nghe nghe a. Chutah chuan, Tlani 3 (Rockin’ years) tihte kha kan thai kaw kalh leh a nih kha. Tlani khan a chhungte pawh a chhiar tir ve vek a niang. Miin min hrilh tlat. Kumkhat te chu a inher liam har lo khawp mai a.

Tlani te nen chuan kan awm ho fo mai a. kan bulah a lo awm ve reuh reuh a, kan titi a lo ngaithla ve leh mai zel a. Chutiang chuan kan hun a liam ve zel a. Selection exam dawn tum khan education paper exam dawn tukah khan room khatah kan thu vek a. Ka lut tlai deuh a, ka bulah lo thu rawh an ti sap sap a. Tlani chu a lo nui var a, a bula awl chu a lo kawk a, mi dang pawh chuan ka thu dawn chiang tih an hriat avangin min sawm zui ta lo a. A thiam a chhuak vaklo a niang, ka hrilh teuh mai. Chutiang tur atan chuan a bula thu tura min duh a ni tih pawh a chiang hle. Tichuan, krismas kan hmang a.

Kuma athar kan exam a, kan la inhmu zauh zauh a. College kan chhuah san a. result a han chhuak a. university lamah zirna ka chhunzawm a, Tlani te chu ka hmu ta ngai lo. An veng KTP film-a a chan vena te chu kan en tui em em ta a. Film hmuhnawm tak phei chu a ni lo. M.A kan zir kumkhatna kum tawp lamah chaun Zonet-ah news a lo chhiar hi ka hmu a. A news chhiar chu ngaihnawm ka ti lem lo a, amah erawh chu a hmuhnawm ka ti nang mai. Zara’n a no min pe a, ka va bia a, tha deuhin min chhang a. Kan in be zui ta fo a. engtin nge kan inbiak leh takloh erawh ka hre ta chiah lo. November thla chawhnu lamah ni a dul raih a. SBI main office kawta a scooter (Scooty-in tih hi!) a ti nung tur chu ka hmu a, ka en reng a. Ka va kal pawh lo a, ni zung chuan a sam chu a chhun a, Gold colour a lo luan avangin a sam chu a rawng a kap mawi hle. Ka hmuh lai ngei chuan a tlan liam leh ta a. Chumi hnu chuan ka hmuh leh mai awm pawh ka hre ta lo a. An ina va len tumna pawh ka nei lem lo a. Tum tak tak ila chu ka leng daih tawh ang chu! Sawrkar service-ah ka luh hnuin, Aizawl Restaurant changkang tak pakhatah kan thianpa nen kan chawl a. Anu nen an rawn lut ve nawlh mai a. chhuah dawn chuan, min lo bia a, a nu hnenah chuan, “Hei hi Roa chu a nih hi” a ti a, Anu chuan, “Khawimaw inchibai ila” a ti a. kan inchibai a, Tlani hnenah chuan, “Lo dam reng rawh aw, lo nula reng rih la” ka ti a, anu chu a nui a. A ni pawh chu a nui a.

Chung atang chuan kum li dawn a liam leh ta a. Kan nun hi a inher a inher a. A tira tum em em vang nilo, hoh mai vanga kan thil ziah chhan nula kha, rilruah a cham ta reng a. Enge maw chang chuan kan hre chhuak fo thin a nih hi. Hmanniah Ben Lalrinmawia Pachuau-in a status-ah a tag hi ka hmu a. Fren rikhuaist ka va thawn ta nghal a. Nula hnenah hian request hi ka thawn mang lo a. Ani chu ka va thawn ve ngat a ni. Tlani kha ka ngaizawng tak tak em tih ka inhre thiam chiah lo a, ka enge emaw chu a ni ve tho mai chu a nih hi. Pachhunga University College-a kan hunlai an sawi a piangin ka hming an sawi chuan ani hming kha an sawi tel ve ziah dawn ta a ni. A hunlai khan ngaihzawn tumin lo bei tak tak ila, kan inngaizawng tak tak mai thei…Ngaizawng lo mai thei, min duh kher lo mai thei a, min han duhna tur ang tak taka awm kha kan tum ngai lem lo a. Engpawhnise, ka MUSE chu a ni ve a nih hi.

SBI kawta Tlani tlanliam tur ka hmuh hnu lawk kha, University-a Pol. Science dept building bulah, tlai ni tur kara kan din lai khan, Tlani chungchang ka hmuh chungchang ka sawi a; ka sawi lai chuan, ka phone-ah msg a lo thleng a, First year atanga ka chhar, nitin mai inzui thin, zantin min rawn be thintu msg hi a lo thleng a. M.A hi South lamah a zir a. “Rote, ka rawn be khat em che a. Ka lo msg mai mai che, zanah i hman chuan min lo call ve la” tih hi a lo ni a, Msg min thawn dawn pawhin ani chuan min kohthinna hi a rawn chhu thlap thin a ni. He nula hi Vl Zuithanga chuan tunge a nih a hre chiang em em a ni.

2013

April thla khan India reads in vana pa hall-ah thla khat zet book fair an buatsaih a, Nitin ka kal a, lehkhabu leinan sum ka seng nasa hle. Chhuara lehkhabu inrem chu uluk deuha ka thlir lai chuan ka hnungah hian tu emaw hi a rawn ding a, thawm a nei mang lo a. Aw nem, dam thlap mai, ka hriat than thin em em chuan, “Rote, kan va in hmu khat em!” a rawn ti hlawl a. Tunge a ni tih ka hre chiang hle. Ka hawi let a, a lo nui var var a.

Khawvelah hian thil thenkhat chu kan hai der fo thin a, kan ngawihbo pui hlen a, kan ta ni ngei tur thil hi kan chan phah foin ka hria.

Many things are lost for want of asking–English Proverb…

2015

IIM atanga Management lam nithum chhung lecture pe tura an chah chhuah vang vang Rohit Dwivedi a thusawi chu ka rilruah a lang hauh lo a, hman zana ka hla lo ngaihthlak , ka hla duh em em thin kha ka rilruah a lo lang a. Tlani te, Vana Pa hall Book Faira “Rote” min rawn titu pawh ka hmuh lohna a rei leh tawh hle.

Khing thil zawng zawng a thlen hnu, kan bialnu enge maw zatin min ban leh tawh hnuah khi thu khi ka han her lum leh a ni e. Keini zawng, Tv PC Lalthanhlira (kum 41 leh kar hnih) tawngkam takin, “Ngaihzawng atan chuan min duh a, pasal atan chuan min duh lo a ni. An hawi an hawi a, min ban leh mai thin”

Tlani te, “Rote” min titute pawh kan theihnghilh zo tawh a, hun tharin min hmuak a, ni duhawm zawkin min lo nghak ve ta.

Vawiin chu khua a chhe ve deuh a, a lawmawm let ling hle. Khaw hnim ruai hnuaia he thuziak hlui ka hai lai chuan, ka laptopah he hla hi U2 leh BB King a te sak dun a lo ri vau vau a,

“I’ve conquered the Past
The Future is here at last
I stand at an entrance to a new word i can see
The Ruins to the right of me
will soon have lost sight of me
Love rescue me”

(25.4.2015 a ka ziah a ni)

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *