THINGSERH REVIEW -F. Lalzuithanga

Lehkhabu hming: THINGSERH
(Ram leh Hnam Din Chhuahna)

Edition : 1st Edition, 2020

Review-tu: F. Lalzuithanga

Khuh Hawn Nan

Pi Pute ‘Thing Serh’ leh Rochana ‘Thingserh’

‘Thing serh sat’ tih țawngkam hi kan hre fo va; ram leh hnam khawih thil thleng eng emaw a awm changin pawl leh mi malin kan lam ri leh fo țhin a. Pi pute thing serh leh Rochana Thingserh hian eng nge inanna leh inzawmna a neih a, ‘Thingserh’ emaw ‘Thing serh sat’ tih chu eng nge a awmzia chiah tih chu he lehkhabu thuhma lamah a sawi fiahna kan hmu a.
C. Lianthanga ‘Hmanlai Mizo Nun’ bua a ziak dan leh he lehkhabu thuhma lama sawi dan hi a inzul viau mai a.VL Siama leh B.Lalthangliana te, mi dang dang pawhin an ziak nual a. Ral lu lam nia Mual laia Thing phun a nih si chuan, C.Lianthangan tu ma en an phal lo ti mah se an phunna hmun hi a ualau riau mai si a, a sattu chu en phal lo mah se hmuh chu an awl viau lo maw te ka ti mai mai☺☺☺James Dokhuma sawi danin, Thing serh atan hian Thingsia an hmang tlangpui a, a awm loh chuan thingthiang pawh an hmang bawk a ni awm e.
Eng thing pawh lo hmang se, a pawimawh ber chu lal leh ram chhan a, khawtlang tana nun thapa inpe ngam te aiawh (symbol) a nihna hi a ni a. Chu concept tak chu he lehkhabu kawmah hian a kawm duangtu hian a rawn hmang a. 8 symbol emaw mi tam zawkin kan tih tur hi INFINITY symbol a lo ni a. Thing serh conceptual image, a abstract idea taka chu tawp lova inpumpekna, chin nei lova inpumpekna nun kha a nih avangin he Infinity symbol hi thingsia leh thingthiang aiah hman a lo ni ta zawk a.
Ngunthluk taka chhiar chhuah hnua kil hrang hrang hrang aţanga thlirin, Thingserh symbol atana Infinity symbol an hmang daih hi a rilin a pui riauva hriatna ka nei a; a bu chhung leh a thu hawi leh he lehkhabuin min thlenpui a tum ram pawh hi a fiah kuarin zu hre teh tlat a maw le…

Thubelh: Tawkthiala, Tawkhuaisena kha chuan muala an thing serh phun chu kik kerh duh tawk mai lovin a fik hmawk e tih a ni a.
Thing serh sah chin dan hi tun hnu Țiau lui kan hnua kan chin chauh a nih a rinawm bawk… a chhan leh vang erawh ka source hi lehkhabu pakhatah chauh ka la hmuh avangin ka sawi chiang ngam lo thung…

Thlirna:

Ram leh Hnam Hmangaihtute tana Sah Tur
THINGSERH-Ram leh Hnam Din Chhuahna

“Ram leh hnam din chhuahna tur chuan RILRU FIM kan put a, HRIATNA THUK kan neih a. RINAWM leh DIK taka kan awm a ngai” tiin F.Vanlalrochana hian thil pali pawimawh tak tak tar langin chumi lam hawi chuan he a lehkhabu THINGSERH pawh hi a ziak a ni.

Ram leh hnam din chhuahna tur kawngah rilru fim puta thil ngaihtuahna thiam turin hriatna thuk leh ril tak kan neih a ngai a. Chuta tana kawng hnai leh awlsam ber chu lehkhabu țha chhiar a ni. ‘Hriatna hi chakna’ tih thufing awmsa kha belh hlek ta ila, hriatna hi huaisenna a ni tiin. A chhan chu ram leh hnam tana rinawm leh dik taka awma thil ti tur chuan huaisen a ngai a; a hmun leh huna huaisenna dik nei thei tur chuan hriatna dik leh thuk kan neih a ngai bawk.

Chutichuan, Rochanan Ram leh Hnam din chhuahna tura THINGSERH a phun hi, lang thei lama kik kerh kerh duh tawk mai lova fik hmawk hmawk duh tur tan pawh pawngpaw basa ngam a, haw haw leh inhrosa chunga a huhoa va pana sah mai tur chi ni lovin, chhungril lama chakna nei hmasa tura mite buatsaihna leh chutianga ‘chhungril chakna’ kan neih theih nana “Khawthlir leh hmathlir min siamsak thei tur chi, tha thar min pe thei tur chi chu ni mah se inzirtirna lam erawh a ni lo a, ‘Ti rawh, Ti suh’ tia infuihna bu a ni lo…rilru sukthlek dik neih theihna tur khawp, țang țeuhva chhiar ngai ni si lo a ni” he THINGSERH hi!

Pu Hruaitea (Lalhruaitluanga Chawngte) thuhma lama sawi angin, ram leh hnam din chhuahna tura mi ropuite chanchin ziahna bu a ni ngawt lo va; mi ropuite (leh ropuia ngaih lohte thlengin) chanchin ropui tak tak erawh tar lan a ni thung. Phek 227+xv a chhah, cheng 300 man, a kawm hma lam pawh a pawng chi ngata chhut; a paper quality lah Mizoram tualchhung bik offset lamin an la hman ve ngai loh paper uk, zang hui mai, ar awp lai chawi ang deuh a ni a. Mizo țawnga chhuak lehkhabu kan hmuh leh hriat, neih ve phak chinah hetiang anga paper quality țha hmanga chhut hi a la awm lo em aw, tih mai tur a ni a. Tun hnai mai aţanga Publishing House thar kan hmelhriat, kum rei lo te hnua Zoram khawvel la al thei tura beisei leh rin ngam tur FRASER MEDIA & PUBLICATION kut chhuak lehkhabu a ni bawk! (Mizorama chhut-khawl hmasa ber laluttu Zosap Pu Fraser hming chawia phuah a ni awm e).

A ziaktupa lamah peng kawi lawk ang. Ku Rochana hian kumin 2020 bik hian thil thar, mi la tih ngai loh țha fe fe a rawn ti chhuak nual mai a. Trend-setter ni mai awma mawi, a Man of Idea tih tur chi ni hialin ka hre țhin… Pahnih khat chauh sawi ila. Pakhat chu Mizo thu leh hlaa kan la neih loh (Chawngduma Hla Sei te, Taitesena tih C.Lalkhawliana phuah te kha chu a hrana a bua khawr a ni hran lo a) Poetry mal bu khata a khawrpum PATHIAN ZAWNNA tih kha a ni a. A hard-copy a siam hmain E-book hi a hralh hnem fu bawk, Rs. 10 man lai kha nia☺☺ A pahnihna chu, tuna a lehkhabu hi a ni leh a. A bu chhung thu eng pawh lo ni se, a printing leh a paper lam thlengin a țha ber ber kan duh tawhna hunah (sum nei lem lo pawhin) Mizo lehkhabu chhuak tawh zinga a țha thei ang ber tura mi dang tante tana entawn tur a rawn hnut chhiah leh hi ropui tak a ni… a publisher lam hmalakna ni tam zawk mah se, ku Rochana ațanga bul țan a ni hi a ropui lai tak chu a niin ka hria a, heng thil pahnih chauh hi a lehkhabu thlirna karlakah zeh loh theih lohah ka ngai!

Thingserh Bu Chhung:

Duhsakna Thuhma leh Thingserh chungchang sawi fiahna hi mi pahnihin an ziak a. A ziaktupa hian Thuhmahruai leh Lawmthu sawina a hranin a nei ve ve bawk a (he thil hi hmun khata tih mai awm chu ka ti deuh va; mahse, a ziaktupa style a ni mahna). Heng ațanga lang chiang tak chu he lehkhabu hi mi pakhat ziak ni mah se, a bu hlawhtlin nana mi tam tak tha thawh thu hi a ni a. Ziakmite tan puibawmtu țha- proof reading te, layout leh editing te, a kawm duan zawng zawng bakah chhuahsaktu (publisher) pawimawhzia hi sawiin a siak lo. Heng a puibawmtu hrang hrangte tha thawh hi hetianga țha leh mawia chhuak thei tur chuan a pawimawh em em a, Ziaktu dang zawng zawng pawhin an mamawh mihring leh mi hlu an ni e.

Ram leh hnam din chhuahna lam hawi țhiau thuziak 28 laite hi Țhen hrang hrang paliah țhen a ni a.
A țhen khatna hian ram leh hnam din chhuah nana HRUAITU ROPUITE pawimawhzia a rawn thlur a. Mi thiam chungchuang BR Ambedkar te, Italy ram suih khawmtu pawimawh Garibaldi te, India Prime Minister ropui AB Vajpayee leh Nuclear Scientist (a hnua Mipuite President ni ta) ropui Abdul Kalam thil tih ropui tak te; mi dik leh thleibik nei lo General Carriapa te pafa chanchin te, Mizo pa ropui, politician dik leh pamham lo, HK Bawichhuaka te, mi tum tlang leh huaisen taka a ngaihdan tlang taka sawi chhuak ngam sipai hotu George Marshall chanchin te, US ram tana Rose Par kuhmum, vul ve ta hman lo Robert F.Kennedy chanchin ațangin ram leh hnam din chhuah nana hruaitu ropui, hruaitu dik leh huaisen pawimawh dan chiang taka tar lan a ni a.

A țhen hnihnaah RAM SIAM ȚHATNA LEH DIN CHHUAHNA bul chu Sorkar țha neih a nih dan chiang takin, India ram ei bar leh sum leh pai dinhmun a tlakhniam ber laia khai tura sorkar-in hma a lak dan, mi thiam Manmohan Singh-a Finance Minister atana thlan a nih dan te, Indian Economy chhan chhuah leh siam țhatna kawnga khatih laia Sorkar hnalak dan ngaihnawm takin a ziak a. He thuziak pahnih, thu pakhat ziahna ni si pawimawh dan hi a bu ka chhiar chhuah vek hnuah ka hmu thiam ve ta viau mai (ka chhiar lai ni lovin).Mahse, tui hnih duah lo mai ang.
Tuna Super Power ram ni mek te, ram hmasawh tawh First World Country an tih ramten an tun din hmun thleng thei tura ram siam țhat leh din chhuahna kawnga tha an thawh a, bul an lo țan chhoh dan hrang hrang- South Korea te, China te, Japan te, Singapore leh America chanchin ațangin a pawimawh zual lai thur chhuakin ngaihnawm takin rawn tar lang a. Keini tan pawh kan ram leh hnam din chhuahna turin inzirna tur leh entawn tur hrang hrang a rawn chhawp chhuak hnem hle a, a bengvarthlakin a ngaihnawm piahah Entawn mai ni lova mahni inenfiahna tur Darthlalang fiah tak a hung chhuak a ni ber e.

Țhen thumna hi ram leh hnam din chhuah nana THUPUI PAWIMAWH tak tak paruk dah khawmna a ni a. An ram leh hnam tana Daniel Webster te, Vercingetorix leh Crazy Horse te inpekna leh tuarna hrang hrang te; Mizoram din chhuahna leh hmasawnna daltu lian ber EIRUKNA chungchang te, kan ram siam țhat duha politik kheltute khelh danah dawta inbeihna hneawm tak kara Barak Obama leh McCain te, Laldenga leh Ch.Chhunga te ațanga zir tur leh entawn tur kan hmuh ropui tak mai te; politik-ah a ni emaw pawlah a ni emaw thuneihna leh lalna atchilhna lak ațanga fihlim a ngaihzia Rom Dictator Cicinnatus nun ațanga kan hmuh ropui tak mai te; mahni zahawmna humhim tura CEC Sastri beih dan ropui tak mai te, Nelson Rockefeller nun ațangin ram leh hnam din chhuah nana ram leh hnamin a mamawhna zawnah mi thiamte thiamna hai chhuah leh hman țangkai a țul tawhzia te chiang takin kan hmu.

Țhen lina hi ram leh hnam din chhuah nana MIZO HNAM KAIHHNAWIH bik thlurbingna a ni a. Thuziak hrang hrang pasarih- Mizo hnam tana MP pakhat (R.Thanhlira MP, RS leh Dr. Roțhuama MP, LS) te tih theih ropuizia leh tam dan te; Hnam Sipaiten Lunglei an lak dan chanchin Brig.General Lalngura titi ngaihnawm tak te; Kalkhaman Sonai hmuna Mizo Bazar hmasa ber a din dan te; Pu R.Buchhawna leh Lalbuaiate hmalaknaa Mizo High Sikul hmasa ber din a nih dan te; Zosaptharan Mizo hnam hla hmasa ber hmanga MIZO LAWM TEH U tia a lo fuih dan leh vawiin thlenga Identity chungchangah kan nihnaa lawm a pawimawh deuh deuh dan te; Mizo sipai leh Gorkha sipaite football-a final an khelh thu ngaihnawm tak mai te; kum 1947-a Mizo hnam puipaten Mizo hnam kal zel dan tur ngaihtuaha an inhmuh khawm ţuma an thu rolum- MAHNIA RO INREL hi kan hnam hmakhaw ngaitute tan chuan kan damna leh din khaw chhuah nan a țul leh pawimawhzia thu hmanga tlang kawmin, ram leh hnam din chhuahna leh hmasawn nana inhlana inpumpekna thinlung neia THINGSERH sat thei turin a bu kan khup rual rualin min buatsaih ta a ni.

Ram leh hnam chhan nan leh din chhuah nana Thingserh sat (tlak ni) ni thei turin a bu i chhiar chhuah ve hmasak phawt a ngai e.

Ps: A bu chhung khaikhawmna te, a chhunga thu mawi leh ropui deuh deuh thur chhuah chak ka thaisen ngei nguai te, ka mimal thlirna leh hmuh dan hrim hrim hi vawi khat post la siam leh thama sei a ni a, a la zo lo tihna nih chu a review hi😎

Published by

F Vanlalrochana

Ka hunawlah lehkha ka ziak thin.

Leave a Reply

Your email address will not be published. Required fields are marked *