THINGSERH THLIRNA TAWI

-Ramlawt Dinpuia

Kum liam ta kha kum ṭha lo leh kum malsawm lo niin kan ngai tak nain, a ṭha zawnga chhinchhiahna tur erawh a awm ve nual a. Mizo hnam anga a ṭha zawnga kum pawimawh a nih theihna tur lian ber pakhat chu hripui leng vanga thil dang tih theih loh kara lehkhabu chhiar leh ziah lama hma kan sawn viau hi niin ka ring. Lehkhabu tlangzarh inkhawm a awm hlei thei lo chungin lehkhabu ṭha tak tak a chhuak nual a. Chu’ng zingah chuan kum tawp dawn te tak taka chhuak, ‘Thingserh, Ram leh Hnam din chhuahna’ F. Vanlalrochana ziah, Fraser Media and Publication-in an chhuah hi a ṭha ber zinga mi a ni ang.

Vawiinah khan ka order a lo thleng ve a, tlai lam aṭanga chhiar ṭanin khup mai mai a lo harsa deuh hlek a, ka chhiar zo thuai. A chhung thu luh chilh hma hauh aṭanga mi hip zar thei lehkhabu hi Mizo ṭawnga chhuak tawh lehkhabu ka chhiar ve phak chin zingah chuan a class ber pawl a nih rih ka ring – ka la chhiar tlem em mai pawh a!

Ram leh Hnam din chhuahna tih a nih ruih avang hian lehkhabu puithu run, chhiar har zet ang kha mitthla lo ula. ‘…khawthlir leh hmathlir min siamsak thei tur chi, tha thar min pe thei tur chi ni mah se inzirtirna lam erawh a ni lo a, “Ti rawh, ti suh” tia infuihna bu a ni lo. A ziaktu hian a chhiartute min fuih fawk fawk lo a, min zilh khur khur lo. Zirlaibu ang maia hlu, zirlaibu anga khawng si lo hi a ni a, rilru sukthlek dik neih theihna tur khawp, ṭang ṭeuha chhiar ngai ni si lo a ni.’ tia duhsakna thuhma ziaktu Lalhruaitluanga Chawngte sawi hian a tichiang.

Lehkhabu chhiar hrim hrim hi a ṭha a, lehkhabu ṭha chhiar phei chu a ṭha leh zual. He Thingserh hi lehkhabu ṭha zinga khung loh theih loh chi a ni a, mi zawng zawngin chhiar thei ila tia duhthusam khum tlak a ni bawk. Kan uar mah mah ti an awm a nih pawhin, keimahah chuan mahni chauha chhiar atan chuan a uiawm ka ti a, duhsak zawngte kawhhmuh leh present chi a ni ka ti.

Famkim lohna khawvelah kan la awm miau avang erawh chuan a famkim bik hauh lo a. Chhut sual palh a awm zeuh zeuh hi, a lehkhabu paper, kawm etc ṭhatzia ngaihtuahin a awm ang lo a, mit a tikham zual! Mi ropui tak tak chanchin a lam chhuah zinga Bobby Kennedy chanchin kim chang deuh zawk a awm ve lo hi ka lo ui. A thusawi ropui chungchang erawh a awm tho a.

Ka vawi khat chhiarnaa min hneh ber lai chu Mizo Sipaite Football Final khelh thu hi a ni a, Mizo hnam hming tiṭha tura kan pute’n ‘Mahni bi tum chhuah loh tur. Tihtluk reng reng tur’ tih thuvawn nei chunga thih ngama football final an khelh chanchin hian hnuk a tiulh thei! Kha khelmual kha Mizo hnam tana indona mual a ni miau a.

Pu H.K Bawihchhuaka chungchang a sawina ‘A Pathian thu awihna chu politics field-ah pu lutin, Politics field-ah a takin a ringtu nihna a tilang a. Biak inah a sawi ṭhin thung.’ tih hi a va han tawk tak. ‘Western values-a kan inchawm nasat poh leh kan hnam chu kan buai zawk.’ tih thu pawh hi ngaihtuah zui ngai tak a ni bawk.

Chutiang chanchin ngaihnawm leh mi cho thei tak tak te, khawvel ram ropuite din chhuah dan ngaihnawm tak tak te, hnam tana inhlan ral mi hmingṭha tak takte chanchin leh kan hnam tana zir tur zirlai, thiam leh ngaihnawm taka sawina lehkhabu hi chhiar a, zir tluk tluk tham a ni.

Published by

F Vanlalrochana

Ka hunawlah lehkha ka ziak thin.

Leave a Reply

Your email address will not be published. Required fields are marked *