THLIPUI HRANG KARAH PAWH

Damlai ThlipuiLehkhabu Hming: Damlai Thlipui

Ziaktu: Lalhriata

Edition: 1st, 2005

Publisher: SL&PB

Phek: 289

Lalhriata han tih chuan ‘Harsatna hnuaia leng kan ni’tih kha thinlungah a lo lang nghal vat thin. Thawnthu ziaktu a ni a, hla phuahtu a nihna mai bakah hian tuna kan lehkhabu thlir tur hi a thawnthu pathumna lai a ni ve ta. ‘Synod Literature and Publication Board’ in an tih chhuah sak a. He thawnthu hian eng thucha emaw ken a neiin, thil eng emaw min zirtir a tum ngei dawn tih chu a chhuahtu board atang hian  a lang chiang nghal awm e.

Keini ang misual riangvai, chaklo leh rethei takte hi chuan ‘Moral teaching’ fuankhawmna ang chite hi chu kan han ngain alutuk lo nghal ringawt zel a.  Thiltha min zirtir tum lutuk lehkhabu ang hi chuan ‘Literature’ tha an tling mawh khawp lehnghal. A ziaktute hi kha ‘an thil zirtir duh’ khan a kaihhruai lutuk ta thin a, zalenna famkim an nei lo a, an zalenna chu phuartu a awm tlat thin avangin lehkhabu tha tak tur pawh kha lehkhabu pangai takah an chhuah fo ta thin a. Literary value nei sang tak tur pawh an ti nep zo vek thin. He thawnthu hi engnge a an ve chiah dawn tih chu kan thlir ber tur chu  a ni.

He lehkhabu hi Mizo Academy of Letters (MAL) te’n kum 2005 chhunga lehkhabu chhuak zinga tha berah ngaiin  ‘Book of The year’-ah an puang a. Chumi hnuah ka kut a lo thleng ve ta thung a. ‘Book of the Year’ kan thlir dawn avangin kan duh fet hle dawn a ni. ‘Book of the Year’ a nihna dinhmun atangin he lehkhabu hi kan thlir dawn avangin tam takin kan hmuh dan leh tlir dan lo deuhin kan sir tlukpuiin a rinawm.

A Thawnthu tlangpui:Khaw pakhat Zonuam khuaah hian naupang pahnih Sangte-a leh Zual-i hi an awm a. Sangtea te chhungkua chu zuin a tihbuai chhungkua an ni a. Zuali te chhungkua erawh chu chhungkaw nuntluang leh zahawm tak an ni thung.

Sangtea leh Zuali te chu an naupan tet lai atangin mak tak maiin an inkawm chho a, an inngaina em em a, an inthlah hlei thei lo. Zuali chu a tleirawl tirhin Aizawlah an pem a, chuta chin chu Sangtea nen chuan an inhmu ta lo vang vang a. Hmangaihna lama an pahnih mit a lo keu chhoh chuan, ‘tunge an thinlung luahtu’ chu an hria a. Hmangaiha lam thu la sawi dawn miah lo, kum tam tak inhmu tawh lo anni chungin an inhmangaih ve em em mai a. An rinawm dun ve tawp mai a ni. (Mihring nunphung pangaiah chuan amakin ka hria!)

Zuali chu nula hmeltha takah a lo seilian a, amah ngaizawnga, nupui atana beiseitu pawha  hmu nual. Sangtea erawh chuan, chhungkaw harsatna avangin sikul a kal chhunzawm thei lo a, a nu leh pa an inthen a, chuti chung chuan tlangval fel takah a chawrchhuak chho a ni.

Zuali chuan shillong atanga B.A. a zawh hnuah vanduaithlak takin a mit a lo del ta hlauh mai a. A mi var laia a mah duh em em tute chuan an kian san a, hmangaihan der vawngtute chu an bibo ta diak mai a ni. sangtea pawh chu hetih lai vel hian Shillong-ah awmin matric a pass ve leh chiah a. Zuali mitdel ahan hmuh chiah chuan, amah a hmangaihna chuan zual lam a apn ve ta sauh thung a. Hmangaihna dik chu harsatna hmunah a par vul thin tih a rawn tarlang a ni. Zuali chu mitdel tawh mah se, nupuia neih a tum ta hial a ni.

Sangtea chu an khaw lamah haw veleh rihin hmun dangah te a vakchhuak ve leh rih a. Chuta tanga a rawn haw chua  rawn thi haw hia ni ringawt mai. Mitthi lumen zan chuan khawvar dawn lamah pitar niawm taka inchei hian sangtea chu a rawn chiu a, a lo tho leh ta a. Sangtea leh Zuali te chuan an induhna te inthlahrung hauh loin an inhrilh tawn thei ta a ni. Inneih hambakin an awm a, Sangtea chu missionary-in a kal ta a. (A ziaktu hian thil hia thlen tir nasa lutuk mah mahin a lang. Sangte-a missionary han kal leh ngawt mai te hia chuang tlai tawh hle a ni.)

Hei hi a thawnthu tlangpui chu a ni.

Sangte-a leh Zuali:

Sangtea leh Zuali te hia thawnthu ziaktu hian a dah pawimawh ber a. Anni pahnih behchhan hian a thawnthu hia remkhawm ta kan ti thei ang.

Sangte-a leh Zuali chu thenhran theih an ni lo. Sangtea hian, “ Zuali hi kalsan thei ka ni lo a, a tel loa hlim thei lah ka ni hek lo,” a ti hial a ni. An tet lai atangin mak deuh maiin an inkawp chho a. Thihna meuh pawhin a kai then thei lo. Zuali tan a ziaktu hian, Sangtea hi a kai tho leh ta a tih ngam hial ang. Khawdang daihah awmin, an taksa chu inhlat mah se, thlarau hmun khatin an insuih zawm a, a tawpah chuan harsatna tam tak paltlangin an inkawp rem ta a ni. Sap hovin, ‘Joy comes in the morning,’ an tih ang deuhin an nuna zan thim a ral hnuah hlimna chuan a hual vel ta a ni.

He thawnthu hi Sangtea leh Zuali ten an nuna harsatna an tawh chungchang tarlanna a ni ber. sangtea leh Zuali te nuna ‘damlai thlipui’ tleh chu Lalhriata hian min hmuh tir a ni ber awm e.

He thawnthu ziaktu hian Plot aiin Character a dah pawimawh zawk a. Sangtea leh Zuali te character-ah he thawnthu hia innghat. Chuvangin, a plot pawh hia tha lo hle, a amwl mah mah niin a lang. Parallel plot a nihna chen a awm bawk lehnghal!

Mizo zingah novel a han chhiar mai tur ziaktu an thahnem ve ta hle. Amaherawhchu, kan novel te han thlir hin rualawh a na duh hle. He lehkhabu pawh hi, Oxford English Dictionary-in, novel a hrilhfiahna,‘A ruhrel leh ruangam chipchiar tak, mawl tak ni lo,’ tih chu a pawl pha lo hle a ni. Encyclopedia Brittanica pawhin, ‘Fictional prose narrative considerable length and some complexity that deals imaginatively with human connected sequence of events involving a group of persons in a specific settings,’ tiin novel hi a hrilhfiah bawk a. Mizo thawnthu phuah dangte han thlir pawhin ‘novel’ tling tak tak chin hi chu kan nei tlem hle awm a nia.

Lalhriata hi plot construction thiam tak chu a ni lo. Mizo thawnthu ziah dan pangaiin simple plot a hmang a, story leh fable te aiin a changkang tehchiam lo. Fir taka teh chuan, ‘book of the year’ meuh a thlan a tana ‘novel tha’ han tih tur chi chu a ni lo deuhin a lang.

He thawnthu hi, kan hmuh angin Sangtea leh Zuali te naupan lai atangin a intan a. An lo thanglian zela, harsatna chi hrang hrang an tawk a. Chung harsatna chi hrang hrang te chu an  tuar chhuah hnuin an pahniha hlimna hun an thleng ve ta a. An nuna thil lo thlen dan chu a indawtin tarlan chhoh a ni mai a. E.M. Forster-a’n, ‘Story’ tia a hrilhfiahna huang chhunga tla lut tur a ni. Story tha pangai taka chhiar mai tur a ni.

A Thuphum: He lehkhabu hi kohhran upa a  nia, a chhuahtu pawh SLPB. Zirtir tum pawh thuk tak a nei ngei dawn tih a lang sa nghal a. Chu chu mizo lehkhabu chhiartu tam berte’n lehkhabu tha an tih chu a  la ni zel a. Zirtir nei tha langsar ber thin chu Kristian novel, hlim thlak taka tawpte an ni thin a, chung zingah chuan he thawnthu pawh hi a tel.  Literature lam zawnga ngaihtuah lutuk lo, lehkhabu chhiar mi pangai tak chuan lehkhabu tha tak chu a ni reng reng. Literature buaipui leh zir mite tan erawh chuan chai lutuk tham a awmin a lang lo. Engpawh nise, he lehkhabu hian a chhiartute hi eng thu nge min chah a tum tih lo thlir dawn i la.

A ti chhuaktu Board Editor chuan Board lamin he lehkhabua thu inphum an hum chu ‘ti hian a ziak a, “ He lehkhabu ‘Damlai Thlipui’ ah hian ruihtheih thil, zuin chhungkua a tihkehchhiat nasat theih zia leh a tihretheihzia chiang taka a lantir hnuah eng anga chhungkaw vlo kehchhe tawh leh lo tlusawp tawh pawh Pathianin a tundin leh a chhungkaw thar Lalpa chenchilh chhungkua a lo dinchhuah leh theih si zia thawnthu ngaihnawm tak hmangin a ziaktu hian a ziak chhuak a. Kristian chhungkaw love stpry ropui leh tangkai tak a tling awm e,” tiin.

He lehkhabu, lehkhabu tha bera thlangtute pawhin he thawnthu atanga hmuh an neih chu hetiang hi a ni:

“He lehkhabu ziaktu hian zuin chhungkua a tihbuaizia leh nun dan thaa nungte erawh chu nunkawng chhukchho zawh mahse a tawpah an hlawhtling thin tih a tarlang a. Nula leh tlangval inhmangaihna pawh thianghlim taka kalpui theih a nihzia thu leh fimkhur lote chan a chhiat theihzia nen min hrilh bawk,” tih hi.

Tichuan, heta kan thil hmuhchhuah chu he lehkhabu hian tum tha tak a nei a. Nun kawng tluang pangai zawh ula, Biak In kawng zawhin nulat tlangval kawngah invawng thianghlim ula, tichuan inhlim ang, a ti a ni deuh ber.

He thawnthu hian kristiante Pathian chu a ropui ber a, engkim a ti thei. Amah ringtute pawhin rinawm taka amah an rin a, an zui tlat chuan mal a sawmin, ‘Damlai Thlipui’ eng anga hrohrang na pawhin nuai mahse a hualhim zel dawn a ni tih min hrilh.

Zirtir neihtir kher hi:Literature hi thuk taka kan thlir chuan literature ropui kan tih, thu leh hla ziak ropui ber berte hi langsar taka zirtir tum nei an ni lo khawp mai. Hringnun darthlalang chiang tak min chhawp sak mai a, chutah chuan keimahni kan lo inentheihna turin.

Mizote pawh hian a zirtir a lan nghal tlat loh chuan kan lehkhabu chhiar lai chu lehkhabu thaah kan ngia ngai tlat lo. Kan ziak ve a nihy pawhin kan lehkhabu leh thawnthu phuah ve te pawh hi sakhaw bu niawm tak takah hian kan chhuah a. Literature tha tak tak tling hi kan nei tlem em em a ni. Ka ngaihdanah chuan, ‘A thua kan kristian lutuk’ hi kan hmasawnna daltu a ni a, literature-ah pawh kan kristianna hi kan rih artui a ni!

He kan thawnthu thlir mek pawh hi a ziaktu hian Kristian a nihna angin, missionary a nihna angin, kohhran upa a nihna atangin he thawnthu hi a ziak a. Kristian te tan he thawnthu hi ziah a nih angin kristiante khawvelah chuan thawnthu ropui a tling a, kristian literature-ah chuan thawnthu tha a ni. Huam chin, huap chin, tum chin a neih avangin kan literature pangai huang chhungah erawh chuan hlutna sang tak a nei lem lo.

Literature-ah chuan hlutna sang tak a nei lem lo. Thuziaktu chu a kristianna emaw, a Israel thlah (Lo ni ta se) nihna te emaw, chung thil reng reng, a sawi duh zawng ti tim tur thil chuan a phuar tur a ni lo. A lo phuar a nih chuan Robert Browning-a te duh loh ber, ‘The lost Leader’ a ni tihna a ni mai. Literature khawvel, zalenna ram khua leh tui ni tlak a ni lo. Thinlunga ‘aw’ chu huaisen takin a puang chhuak thin tur a ni. Chutah chuan thutak kan hmu anga, tah chuan mawin a kan hmu ang. Chu chuan hlimna min pe anga, chutah chuan hringnun hi fiah takin kan hmu thei ang. Chu chu a ni, literature dik, literature tha chu.

Literature hi ‘art’ a ni a, ‘art’ ah chuan beauty a inphum tur a ni. Kan thu leh hlaah te hian artistic beauty kan hmu tur ani. Thil mawi ‘mawina’, takna, thutak mawina hmuh fiah tir hi literature-in a tum pawimawh berte zinga mi a ni reng tur a ni.

Sangte-a, Lungpui Chunga In sa: Sangtea hi mifing, lungpui chunga insatu a ni. A dinna  hmun hi Krista, Chatuan lungpui a nih tlat avangin ‘Damlai Thlipui’ hrohrang na takin a nuai pawhin a nghing ngai lo a, a tawpah chuan Zuali nen suihzawmin an awm ta a ni.

A pa chu zu bur a ni ringawt. A nu leh pa an inthen a, apain nupui dang a nei leh a. A nuhrawn Lalduhi lahin a la beisei zui. Nula (nuthlawi) fel tak Chhuangpuiin a theihtawp chhuaha zawl thluk a tum pawhin a hmangaih Zuali, hmun dang daiha awm, ‘a hmangaihna  a ni’ tih tak ngial pawh ala hrilh si loh lakah chuan a pawngpaw rimawm ve tlur mai a ni.

Sangtea chu zu leh mipat hmeichhiatna lamah a theihtawpin a insum a, a tette atangin ‘ding leh veia peng loin’ nunkawnga  zawh a, tunlai khawvela tlangvalah chuan tlangval fel tawp a ni.

Sangtea ramhla tak atanga a lo haw chu a rawn chau haw em em a, a thi ta a. (p-244). Vui tawh mai tur, an lumen pui mek chu mi pakhat, pitar incheia inchei hian a rawn jection ta a. A  lo damchhuak lehin Zuali nen chuan suihzawmin an lo awm leh ta a ni.

He thawnthuah hian mihring nuna thil thleng atan chuan aropui lutuk mah mah tih tur a awm nual a. A chunga kan tarlante ang phei khi chu a ropui dan a namai lo hle.

Zuali chanchin te pawh hi han thlir ta i la. Ani pawh natna khirh takin a man a. Thawk leh khatah a mit a del ta thut mai a. Tum khat chu high School field-ah crusade a awm a. Chutah chuan, kebaite, zeng te leh natna tuarte’n damna an chang a. Chutah chuan Zuali pawh a mit a lo var ve leh ta a. ‘Tihdamna kawl’ inti te pawhin mitdel mit kher hi chu an ti var mawh khawp mai. Lal Isua leh a zsirtirte tihloh kha chu mitdel mit tihvar saktu hi ka hre mang bar lo. Amaherawhchu, Pathian chu engkim ti thei a ni a, Zuali mit pawh a tidam leh  a ni mai a. ‘Tah hi chuan sawi tur kan nei lo. Tu nun pawha thil thleng thei a ni. Ringtute chuan kan rin phawt chuan tlangte pawh kan sawn thei a ni.

Sangtea thi lo thawh leh thu erawh hi chu a mak tih paihlam hret a ni. Pathian hnathawha puh tur chi a ni bawk si lo. Mi pakhat, pitar anga incheiin a rawn chiu a, a lo tho leh ta kha a ni a. Isua Krista, Lazara, Anurag Basu, Rishab Bajaj, leh Lalrosanga te hi thihna hneha lo tho leh awmchhun an ni awm e. Taka Jaira fanu, Isua Krista kaihthawhte, Hmeithai fapa kaihthawhte pawh a awm tak e. Jaira fanu, hmeithai fapa, amah Isau Krista leh Lazara chiah hi Pathian hnathawha lo tho leh chu an ni. Pathian chauh mithi kaitho thei a awm. Sangtea hi he thil tawk kher lo hian Zuali nen inhmu leh ta se a fuh zawk hmel!

Zuali mitdel hi Pathian remruatah lo ngai ta i la. Mit var Zuali kha Sangtea hian phu thlawtin a inhre lo a. Zuali mit hi del ta kher kher lo se Sangtea nen hian suihzawmin an awm awm lo ve. Zulai vaduai hmaa amah beiseitu tlangval duhawm tak takte an  kiang a, hmangaihtu diktak Sangtea erawh chuan a hmangaih zual sauh emaw tih tur hi a ni thung. “Hetih hunlai hi kan hmangaihna lo lan chhuah hun tur ber a ni,” Sangtea chuan a ti tlat a, Zuali chu a hnualsuat phah chuang reng reng lo. Zuali mit pawh a lo var lehin Sangtea nen chuan tisa leh thlarauah an inpawh leh ta nghe nghe a nih kha.

Sangtea a thi a, a tho leh hi chu a fuh lo deuh a ni. Zuali nen hian a ziaktu hian suihzawm leh a tum  rau rau anih chuan a ziaktu hian Sangte-a hi accident tir ta mai zawk se, ‘tah chuan Zuali hamngaihna pawh kan hmu chiang thei zawk ang. A pa pian thar tir a, an chhungkua suihzawm leh pawh a remchang vek tho awm e.

Hmangaihna dik: Hmangaihna hi khawvela titi hring chhuak tam ber, thu leh hla pianchhuahtirtu zingah chuan a ber a ni hial awm e. Hmangaihna hi engnge a nih hriatfiah thiam a har hle a. Hrilhfiah pawha  har hle. ‘A nuna nunfiah tur a ni’ thenkhat chuan an ti thin.

Hmangaihna diktak nihphung chu a kimchangin hmu lo mah ila, chung zinga thenkhat chu he thawnthua kan hmuh nula leh tlangval, Sangtea leh Zuali inhmangaihna atang hian kan hmu thei awm e. Kan chhinchhiah tur erawh chu, he thawnthu hian nula leh tlangval inhmangaihna hia  thupui ber (Main theme) a ni lo tih hi.

Sangtea hian Zuali hi a hmel a duh a ni mai lo a, Zuali a nihna chu a ni a duh ni. A mit a del hnuah pawh chuan a duh zual sauh emaw tihtur hi a ni a. “Zuali hi kalsan thei ka ni lova, a tel lova hlimthei lah ka ni hek lo”, a ti hial a ni. Hmangaihna diktak chu, hei ngei hi a ni, Sangtea hmangaihna ang hi. Engkim a huam a. A chhan bulpui ber chu engdang a ni lo, ‘Amah chu a ni’. Pathian pawhin keimahni kan nih avangin a ni keimahni hi min hmangaih ni. Chutiang tho chu nula leh tlangval inkara hmangaihna chua ni tur a ni. Sangtea’n Zuali a hmangaihna pawh hetiang chiah hi. Amah a hmanaih vangin a ni amah chua  hmangaih. Hmangaihna dikatk chauh a dingchang thin. Chu chu he thawnthuah hian kan hmu.

Tawng Chungchang: He thawnthu hi, Mizo tawng tlaungtlam, mar taka ziah, a tawngkam hman pawh tha pangai tak a ni. Thuril leh awmze nei ropui lutuk han phawrhchhuah tur erawh chu a awm lutuk loin a lang. Thintlang nula fel tak a ang a, a mam, tluang purh mai. Chhutsual hmuhtur pawh aawm tlem khawp.

He thawnthu ziaktu hian mizo tawng a thiam hle a, tunlaia kan mi hriat lar tam tak, tawng inti thiam tak takte ai hian a hmang dikin a hmang mawi daih zawk. Tin,a  tawngkam hman a dikin a tluang tha a, tawng inti thiam em em mai, tawngkam hman dik an tum lutukna lama an lehkhabu  ti ngaihnawm loh zo vekte ang a ni ve lo a, a chhiar ti nuam tawk chauhin a hmang thiam a ni. Book of the year citation a tarlan tur khawpa, ‘A tawngkam a mawiin chhiar a nuam a, lehkhabu tha leh hlu a tling’, han tihtur em erawh  chu a ni lo deuh chuan kan hria.Tawngkam mawi leh chhiar man hla hrim hrimte lehkhabu tha leh hlu kan tih dawn chuan, heia tawngkam mawi leh tha zawk, chhiarnuam zawk lehkhabu, kan thenawm nula senior kum zah zet tur, literature tehfunga teha sang lemlo tak tur thur chhuah tur ka hre teuh mai.

Hei hi a tawngkam hman a dik lo, hei hi a grammar a dik lo, hei hi a ziah zawm lo a, tia han thur chhuah phauh phauh chu ka tum lo a, chu chu lehkhabu tha leh ropui, literature tha nihtirtu a ni lo. He’ng hi a pawimawh loe ka tihna phei chu a ni lo. Tawngkam mawi leh tha thei ang bera ziah tluk chu a awm lo a, chu chu a lehkhabu timawitu tak pawh a ni a, tin, lehkhabu tha chu tawng mawi leh tha thei ang bera ziah a ni tur a ni. Mahse, hei hi chu a lehkhabuin a ken tel ve lek a ni. Tawng mawi leh tha thei ang ber chuan eng lehkhabu nge, eng thawnthu nge zaih a nih tih chu a pawimawh ber a ni. Tawng hi chua  thawnthu ziahna, a lehkhabu ziahna hmanrua mai a ni.

Novel te ang ngat phei hi chu a ken tel (Element) hrang hrang, he’ng- Plot, Character, Settings, sawi chhuah dan (narrative method), Point of view, scope, myth, symbolism, tih ang chi kan thawnthua tel ang hrang hrangte thiam tak leh mawi taka tah pawlhin thawnthu ropui taka dinchhuah a ni thin a. Chu thawnthu chu tawng mawi leh tha taka ziah a ni em tih chu kan thlir chauh zawk tur a ni. Critics duhtui zual phei chuan complex plot an ngai pawimawh hle. Chutiang kawngah phei chuan he thawnthu hi a thuk lem lo hle. Critics tam takina n duh loh deuh, parallel plot a zui titih bawk si a. Ngaihtuahna sen ngai miah lovin tu pawhin he thawnthu hi kan hmu tlang  nghal vek thei a ni.

A Ziaktu a thu ber:    He thawnthu-ah hian a ziaktua thu ber. Chu chuan  a thlen tur ang pawh a thlen tir pha lo a ni. A nih tur ang a nih chhuah zawh loh phah a ni. He thawnthua  mite, Sangtea leh Zuali chang lo pawh, Damlai Thlipuiin a nuaite chu a chhanchhuak leh vek a, nun hah chawlhna a pe leh vek a ni. Pu Liankima  a paing thar a, thangkhat lian zet a lo then tawh a nupui Rohmingthangi nen insuihzawm lehin chhungkaw thar an din leh. Sangtea leh Zuali te chu kan hre tawh. Nun kawng chhuk chho chu han zawh ve thin mah se, an nukawng tinrengah hian, a ziaktu hian chawlhna, bikhulna  hmun, hahdamna a pe zel a ni.

Thawnthu tha leh ropui tak takte-ah erawh chuan a ziaktute hi an thu lo thin khawp mai!Plot fel taka duan, settings mawi tak, character mumal takah chuan a changtute chu an mizia, an chunga thil thleng, an awmna hmun avangin hringnun an hmachhawn dan tur ang takin an hmachhawn angai a. AQ ziaktuin a changtute ava chhan a, a hum vak kha a rem lo  a ni. Mizo Novel pakhat ‘Damlai Thlanthim’ te kha han thlir ta ila. Amah chhuana khan a zir em mai a, chumai bakah, a hunlaia khawtlang nun te,  athian kawp hote khan an zir em mai a, a lo chawr chhuahna a fuh lo nen, a chungah khua  a dur tluan zak mai a. Tlanchhhuahna hun te chu nei mah se, a mah leh amah chu a inpal hnawk leh thin. A thawnthu tawpah pawh a ziaktu khan Chhuana nun chhum dum kha a vai kian sak chuang lo a nih kha.

Kan thawnthu thlir laiah erawh chuan Sangtea thi tawh hnu pawh a lo tho leh hial!A ziaktu hi a thu mah mah a ni. A dang a ziah leh hunah chuan a changtute’n an nunkawng tur ang ang chu chhan ngai lovin an zawhin an hmachhawn ve tawh turah i ngai ang.

Novel thaah chuan a ziaktute an thu chungchuang hi a dik lovina remchang lo tih hi i chhinchhiah tlat ang u.

Sawi tawh angin a ziaktu hian kristian a nihna angin, kohhran upa a nihna angin, chumi dinhmun atang chuan he thawnthu hi a ziak a. Chu chuan a phuar tlat a. Phuartu a awm tlat avangin he thawnthu pawh hia  ziah that tur ang huin a ziak chhuak tha lo niin a lang. Hei vang hian a thawnthu pathumna lai ni tawh mah se, Lalhriata tak tak hi kan lo hmu lo niin a lang.

A ziah leh hunah chuan thawnthu ziaktu a nihna angin, mihring a nihna angin, khawvela cheng a nihna angin ziak tawh sela; Kristian a nihna te, kohhran upa a nihna te chu dah bovin, amah a nihna ang takin, englam mah awn loin, thluk bik nei loin, khawvel a nihna nag taka thlirin a thawnthute ziak turin ka duhsak a. ‘Tah chuan Lalhriata tak tak kan hmu anga, Kristian literature huang chhunga lehkhabu tha mai ni lo, literature pangai (Secular Literature)-a lehkhabu ropui kan neih belh ngei ka ring. Tin, ka beisei bawk. Chutiang ziak tur chuan theihna  a nei tih hmutu ka ni.

I Khar dawn teh ang u: He lehkhabu hi sawisel tum hrim hrim ka ni lo a. ka literature tarmit vuahin, hnam pumpuiin thawnthu chhiar kan thiam zawk nan, tan lam  nei miah loa ka thlirna a ni. Lehkhabu tha lo a ni tih ka sawi miah lo tih inhmu thiam bawk ang. Sawi tawh angin Mizo Kristian Literature huang chhungah phei chuan lehkhabu tha berte zinga mi a ni.

Kum 2005 chhunga lehkhabu chhuak zingah chuan, ‘a tha ber e’ han tih tur emaw chu a niin ka hre lo. Booker Prize petute’n endik se chu Award an hlan ka ring lo. 1997 Booker Prize dawngtu  Arundhati Roy- Novel, ‘God of Small Things’ te pawh kha Mizote endik nise chu kan Book of the Year hlan ve thinte hi chu a dawn ka ring lo. Jumpa Lahiri-i’n Putlizer Prize a dawnna, a thawnthu tawi lawrkhawm, ‘Interpreter of Maladies’ te pawh kha nikuma Mizo lehkhabu chhuak zingah tel se Top Ten Book of the Year- ah pawh a tel pha ngut ang emaw!

He lehkhabu hi zirtir nei tha tak, Kristian nun uluk mite’n an hman tangkai leh ngaihnawm an tih tak tur a ni. Lalhriata hian kan literature huangpuia chhuan tham thawnthu a ziah theih nan i tawngtai ang u. A  ziahna tur thiamna chu pekin a awm tawh a. Thawnthu ropui lehzual zawk a rawn piantir ngei beiseiin i nghak ang u.

Lalhriata hi dam reng rawh se. Lehkhabu tha dang min hlui leh sela, a thlahte chu lo pung zel rawh se.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *