THURUK HAIHAWNNA

Thuruk Haihawnna

Lehkhabu hming: Ruamrai thuruk

Edition: First Edition.

Thawnthu ngaihnawm em em mai, a chhiartu tawh phawtin, “Hei hi chu ka ziah ni se,” an tih hi a tam lo khawp ang. “Heti ang hi chu ka ziak thiam ve lo vang,” an tih thin thawnthu pawh a tam chuang lo vang. Mizo thawnthu tam tak hi a chhiartu tam zawk chuan ziah thiam ve mai an inring tlat thin zu nia!

Bawngkawn Chhim Veng tui liak C. Lalnunchanga thawnthu thenkhatte erawh hi chu a chhiartu zawng zawng tih theih hial turin, “Ka ziak thiam ve lo vang,” an tih tur thawnthu a ni a. A novel pangana Ruam Rai Thuruk ngat phei hi chu a chhiar apiangin an ngainat thu an sawi deuh vek a. A thente phei chuan zana chhiar an hlau hial a ni awm e.

Ruam Rai Thuruk inthup thukzia hi ngaihtuah nawn leh fo a ngai a. Ngaihnawm chhiara chhiar liam satliahte chuan a ngaihnawmna bak hi an pel lo fo a ni. Thuruk inthuahthip urh a inthup tlat tih hrethiam pha chu mi tlem te an ni hial awm e.

Hmasang ata tawh ramhuai thiltihtheihna chuan mihringte a lo hual vel tawh thin a. Mak danglam tak anga ngaiin mi tam tak chuan thim lal hnuaiah thuneihna hmuh tumin a hnenah an intulut fo va. A tawpkhawkah erawh chuan ramhuaite pawhin Ropuina Lalpa chu an lo ngam lo va, ramhuai thuneihna thlangtute pawhin thihna meuh chu an pumpelh lo. A nihna takah chuan a tir atang reng khan thihna an lo thlang tawhsa a ni.

Heng zawng zawng te, hemi piah lam thil tam tak te pawh ‘Ruam Rai Thuruk-ah’ hian haihchhuah tur a tam a. Mihring huaisenna hi eng ang chiaha thuk nge tih te, mihring mihrinna kawng kan duh phawt chuan kan dinna ngaiah  nghet takin kan ding thei tih leh,  thil dang tam tak he thawnthu atang hian hmuhchhuah tur a awm a ni.  Chung zinga \henkhat chu haichhuah tumin kan bih ang a. A ngaihnawmna piahah hian thil tam tak a awm a ni tihte tal kan hriat vena turin.

Ruam Rai Thuruk hi Mizo irawm chhuak ngei thawnthu chhiar tur kan hmuh zingah a ngaihnawm ber hial ang em?  He zawhna hi i chhan tur atan kalsan a ni.

Zawhna dang leh: hawi zawng hrang deuh, Tluanga’n ‘Ruam Rai’ nena inzawm tlat thuruk a rawn hai hawng a. Tumvuaia sualna leh a nghawng kan hmu thei a. Tumvuaia chu thihna âng chhunga mi ni tawh mah se, a hlimthlain a thlahte a la tihbuai zui zel dan kan hmu a. Tumvuaia chuan ramhuai a lo be thin a, thiltihtheihna eng emaw tak a neih phah nghe nghe a. Chu chu a tunu, a fanu ni tho si Rosangpuii pawhin a chhawm reng a. Ramhuai an biak dan hi a mumal khawp mai a. Voodoo sakhaw biak dan chiah maia India hmarchhak vela thingtlang khaw kilkhawra an lo be ve hi a mak hle a. Vai pakhatin a zirtir a ni a. He vaipa pawh hian a hre thuk lutuk mah mah lo maw? Tumvuaia te ramhuai biak dan hi a mumal lutuk? Vaiho zingah ramhuai be thin an awm ngei mai, kan hre thin. An ramhuai biak dan an sawi kan lo hriat ve thin leh Tumvuaia te hnena ramhuai biak dan kawng kawhhmuhtu tihdan hi chu a inang lo. Eng vanga heti em ema mumala ramhuai lo be thei mai nge an nih? I ngaihtuah zui leh i chhan atan kan kalsan leh ang.

RUAMRAI THURUK LEH THE RETURN OF THE NATIVE:

‘The Return of the Native’ chu sap thawnthu a ni a. Kum zabi 19-na chawhnu lam leh kum zabi 20-na tir lama Sap pachal thawnthu ziak thiam leh hla phuah thiam Thomas Hardy-a thawnthu pakhata ni.

Hardy-a thawnthuah hian ‘Egdon Heath’ a awm a, an ruam rai ve a ni a. Chu ruam rai chuan a thawnthu chu a thunun vek a. Chutiang chiah chuan Ruam Rai Thuruk thawnthu laimu chu  ruam rai chhungah hian a inthlung a ni.

Hei lo pawh hi inanna thui tak a awm a. Kan tarlang zui rih lo mai ang a. The Return of the Native leh Ruam Rai Thuruk chhiar ve ve tawhte chuan heng thawnthuah hian inanna eng emaw chen awm mah se,  Ruam Rai Thuruk ziaktu hian The Return of The Native hi a entawn eih lo tih kan hria ang.

The Return of the Native hi a thim khup a. Chutiang thovin Rum Rai Thuruk hi a thim a. A ziaktute hian a changtu thenkhatte a tawpah duhsakna tlem an pe leh hram a ni tih kan hmu thei ang.

Hardy-a hian a thawnthu innghah nan hian suangtuahna a din Wessex khawvel a hmang a. Geography, ram hmelhmang, landscape, chumi biala mipuite nunphung (folk ways) Agriculture, pursuits leh kawng dang. Heng a thil chher chawpahte hian a thawnthu hi a innghat a. C. Lalnunchanga pawh hian Zoram chhunga a taka awm lo hmun thar siam chawpin, chungah chuan a thawnthu khawvel chu a rem a. Ka Mi Huaisen Leh Ka Pasal\ha, Pasal\hate Ni Hnuhnung leh Ruam Rai Thurukte pawh hi chutianga a ziah chu a ni.

Amahin hmun thar a din a, chutah chuan a thawnthua a changtute’n nun an hmang a. Thomas Hardy-a chang lo C. |huamluaia ngei pawh kha hetianga ti thin tho hi a ni a. C. |huamluaia thawnthua hmun (setting) te ai chuan C. Lalnunchanga thawnthua a changtute chet tlatna hmunhmate hi Mizoram chhunga awm ngei tura rin leh pawm a awl zawk awm e.

ALLEGORY- CHRISTIAN NOVEL

Allegory chu, “A thu inziak hian awmze dang a nei lehchhawng a ni,” tiin hrilhfiah ila a tawi thei ber awm e. Allegory kan hmelhriat hmingthang tak chu Kristiana Vanram Kawngzawh, John Bunyan-a ziak kha a ni a. John Dryden-a ‘Absalom and Achitophel’ te pawh kha Allegory a ni.

Daniel Defoe-a ziak Robinson Crusoe kha allegory angin an sawi fo thin a. Allegory tura ziah phei chu a ni lo. Ruam Rai Thuruk pawh hi allegory angin a sawi ve theih a ni.

A thawnthu tan tirah hian Tluanga chu Selina-i nen an inthen tih kan hmu a. A hnuah Remsangpuii nen an innei a. Remsangpuii chu ruam rai-a thuruk inthup nen thui takin an lo inzawm a. Tluanga chuan a nupui, a duh ve em em chu a kalsan ta a. A tawpah chuan Selina-i nen bawk an inkawp leh ta a ni tih kan hmu a. Remsangpuii nena an inneih lai reng pawhin hian Selina-i chu Tluanga thinlungah a thi ngai lo. A thawnthu tluan hian Selina-i chu Tluanga lakah a rinawm reng a. Tluanga chu a rawn inlamlet phawt chuan englai pawhin a lo pawm reng a ni tih kan hmu.

Hei hi Ringtu nun tehkhinna pawh a ni thei. Tluanga hi Kristian ringtu chu a ni a, Selina-i hi |hatna emaw, Pathian entirtu emaw a ni thei a. Remsangpuii hi sualna entirtu a ni.

Ringtu tam takte pawh hmangaihna ata kan vak bo fo va. Pathian hmangaihna chu kan haider a. Tluanga pawhin Selina-i chu a lakah a rinawmin amah chauh a hmangaih tih a haider lui tlat a, a kalsan a. Remsangpuii hmelthatzia an sawite chu a hria a,  an innei ta nghe nghe a.  Hlim angreng takin an awm chho a nih kha.

Chutiang chuan ringtu tha takte pawh Pathian hmangaihna âng chhung ata an vak bo va. Sual rawng bawlin an tlan a, eng emaw chen chu hlim âwm tak pawhin an awm a. Remsangpuii a neih hnuah Tluanga chu hlim mah se, thil chi hrang hrang a thleng chho va, Puii te leh thil eng emaw tak chu an lo inzawm si a. Tluanga te nupa pawh an hlim lo va,  a tawpah phei chuan an nupa chu an tawp dun chiang hle. Chutiang bawkin sual rawngbawl chu eng emaw chen chu hlimawm âwm takin lang thin bawk mah se, a tawpna chu a rapthlak hle. Rosangpuii ( a nupui laizawn) leh a sual rawngbawlpuite chu thihna \ihbaiawm tak chuan chatuan atan anchhia phur turin a lem zo ta a ni tih kan hmuh bawk hi.

Tluanga leh Remsangpuii an inthen a, Selina-i nen an inkawp leh a. Selina-i chuan a lo la pawm reng si a.  Chutiang bawkin sual rawngbawla vak bo tawh hnu a fa duh takte chu Pathian chuan a hmangaihna ban phar chhuakin a lo inhawng reng thin a ni.

Tluanga chuan Selina-i rilru a tina thin a. Amah tihnat tum hrim hrima khawsak changte pawh a nei \hin.  Amah tina a,  tirethei em em thintu Tluanga chu Selina-i chuan a hmangaih reng a, a ngaihdamna ban phar chhuakin a lo pawm leh ta a ni.  Chutiang bawkin ringtute pawhin kan Pathian hmangaihna kalsanin a rilru kan tina em em thin. Mahse, kan inchhir a, kan inlam let leh phawt chuan kan tan a lo inhawng reng a ni.

Ringtu nun sermon ropui tak he thawnthuah hian a inphum a. Allegory a ni a, Kristian novel ropui tak a ni. Sual rawngbawl chu a tawpah thihna a ni a. Ramhuai thiltihtheihna lah chatuan daih a ni lo va. Mihring taksa thihna pawh a dang zo lo tihte thlengin he thawnthuah hian kan hmu a ni. Thlarau thihna a la thlen zui bawk. Hei lo liama Kristian novel.

INPAWMNA: Ruam Rai Thuruk thawnthua kan hmuh pawimawh em em pakhat dang leh chu. Inlaichinna hlawhtling a awm theih nan chuan lehlam lehlamin an inpawm tawn a ngai tih hi a ni.

Mihring inlaichinate chu an tlin lohna leh an chak lohna zawng zawngte nena an inpawm tlan hian inlaichinna hlawhtling a lo awm thin.

Rotluanga leh Sailiana mizia chu inang lo lutuk a ni a, mahse thian inkawm ngeih lutuk an ni tlat. Remsangpuii chu mite thinhrik deuh a nih laiin Rotluanga chuan a nei a. Ruam Rai Thuruk hai hawn a lo nih tawh hnu chuan Tluanga hian Remsangpuii hi a pawm thei tawh lo va, a kalsan ta a ni.

Selina-i chu Tluanga chuan duh em em mah se, Zoliana nena an chanchin mi sawi a hriat thawi avang ringawtin Selina-i chu a pawm thei hlawl lo. A thawnthu tawpah erawh a tihsualte hrechhuakin Selina-i chu a pawm leh ta a. Selina-i pawhin Tluanga nun zawng zawng nen a lo la pawm thei reng a ni.

Inlaichinna hlawhtling awm tur chuan kan chak lohna te zawng zawng nen kan inpawm tawn angai a ni tih he lehkhabuah hian kan hmu thei a, Zirlai ropui tak he thawnthu hian min chhawp chhuah sak a, khawvelin chhungkua, leh khawtlanga harsatna thlentu bul a tihkianna a zawn a zawn thin chu he thawnthu ziaktu hian min chhawp chhuah sak a, cheng maktaduai tam senga hnam ropui zawk ten an lo zawn thin chu pawisa tih tham mang loha a chhanna kan hmu hi lawm tur kan ni.

MIPA: He thawnthu ziaktu hian Mizo mipa chu engang mi nge a nih ang tih zawhna chu Ruam Rai Thurukah hian Rotluanga hmang hian a chhang a. C. Lalnunchanga’n Mizo mipa a duhthusam chu Rotluanga-ah hian hmuh tur a awm a. Rotluanga chu eng ang mizia nge a nih i lo hai chhuah ve atan kan kalsan rih ang.

KHAR PHAWT ANG:

Mi tam tak ngaiha Mizo novel awm tawh zinga tha ber Ruam Rai Thuruk thlir thuak thuakna chu i chhiar zawh tak hi a ni a.  Thil tam tak kan sawi tawh a, kan la sawi loh tam tak a awm a. Setana’n Lal Isua a thlem t

um a, “Remchang dang atan a kalsan ta,” tih ang deuh khan C. Lalnunchanga Ruam Rai Thuruk pawh hi remchang danga thlir zui atan kan kalsan rih phawt dawn a ni.

Engpawh ni se, hetiang novel ngaihnawm lutuk chhiar theiha kan nei hi kan vannei hle. A ziaktupa hi dam reng se la, a dang pawh ziak zel rawh se. Mahse, hei aia ngaihnawm hi chu a ziak thei tawh ngut ang e maw?

Published by

admin

Ka hunawlah lehkha ka ziak thin.

4 thoughts on “THURUK HAIHAWNNA”

  1. Ruamrai thuruk hi ka thawnthu chhiar tawh zingah chuan a ngaihnawm ka tihte zinga mi a ni. Sap tawngin let sela film-a siamtir a chakawm ka ti ngawt mai

Leave a Reply

Your email address will not be published. Required fields are marked *