TLABUNGAH INTHLAN

Tlabung bial hi Assembly Constituency ang zawng chuan, West Tuipui tih a ni a. Hemia Zonal officer tur hian Ni 26.11.2018 chawhnu lamah ka driver K. Malsawma leh ka PSO Lalhmingmawia nen kan kal a. Tlabung lam hi a tu amah kan la kal ngailohna a nih avangin kan zawt chawp thla a. Phairuang kai te chu Lungsen emaw te kan ti thla a. Tlabung peng kan hai avangin, Chhumkhum atangin peng ta lo chuan kan tlan tlang a. Lalnutui khua kan va thlenin, “Hei hi khawi khua nge?” te kan han ti he haw a. Tlabung lo lamah kan tlan tih min hrilh avangin kan let leh a. Hetiang velah hian darker hnih dawn chu kan paih awm e. Kawng an lo lai zal zau tha nasa si a, la metal lo mah se, kan lo tlan deuh vuk vuk mai a. Chawngte kan thleng lo chauh a ni ber mai e.

Lungsen peng kan va thlen leh chuan, congress ruaitheh haw hi motorah a khat tan tan hian an rawn in phur chho a. Sumo chungahte pawh an chuang. Khua a thim tawh si a. An accident ang tih pawh a hlauhawm fu. Lungsen thleng chu kawng chhia rau rau-ah a la zia hle. Lungsen atanga Tlabung lam kan tlan thla chu kawng a chhe tawh hle. Tuichawng kan han tlan pel chu ka rilru a na hle a ni. Chakma ho khawlaiah an lo vei sup sup a. Party flag lo intar tuarh a. Khawlaiah an lo awm khawm tulh tulh a. Engnge an tih ang tih chu a ngaihruat thiam theih. Chung chu lunglei atanga hnai te mai an ni. Chakma lo inhawngbi tup tup na chu.Kan ram dinhmun ka ngaihtuah a. Ka mittui a tla hial.Kawng chhe theihnghilh thaka ka rilru a han nat chu!

He hnam hmangaih hi a va han hahthlak em! A Beidawnthlak ngawih ngawihin ka hria.Mahse, he hnam tan hian tuin nge thawk chuang ang le.Ka fanu hi he rama thil thate ei a, he leilunga thlamuang taka seilian a, a chanvote chang tura ka duh si avangin he hnam hmangaih hi ka bansan thei si lo.Ka thlahte hian chhuang taka kan ram tihtur an la neihnana ka buatsaih angai si.

Km 30 chauh chu darkar hnih leh a chanve kan kal a. Tlabung chu dar 9-ah kan thleng thla a. Tlabung SDPO BM-a te inah chaw kan ei hnuin, kan riahna tura a lo tih fel sa, Forest Rest house lamah kan phei a. Zan kan riak a. Boruak a reh raih mai a. A nuam phian mai. Tlabung boruak lumin thlasik a hmuh tawh avangina lum tawh lem lo a, a nuam hle.

CHAKMA HO KA ZILH

Ni 27.11.2018 chuan Silgur, Diblibagh leh Tlabung Dintharah kan kal a.

Silgur kan kalna chhan hi, Critical Polling Station ECI-in a tih zinga mi a ni a. Tlabung atangin kan han zawt chawp leh pek a. Kawng an lo lai zau leh hluai mai a.Helai bialah hian nakinah nasa takin hmasawnna a la awm dawn tih a chiang a. Foreigner an pun hluai lohna turin sawrkarin hma a lak ngei chu a ngaiin ka ring. Silgur kal tur kha, Kawrpuichhuah kan zu thleng hial. Kawrpuichhuahah hian silgur khaw chakma pa a lo awm a, a lo chhoh ve duh avangin leh kawng kan hriat loh avangin kan phur tlang a.

Prity Chakma a ni a. Kum 60 chuang hret a ni. Politics boruak kan han zawt a. A sawi nual a. BJP candidate chu pawl 10 pass lo, doctor a inti ve ringawt a ti. Mizo Tawng pawh thiam tha lo a tia. Foreigner a ni em ka tih chuan, “Ni lo e. 1950 atanga an khuaa awm tawh chu an nia, an chhungkaw ho hi” a ti.

Foreigner an ngaihtheih loh thu leh anmahni avanga an buai thu a sawi nial a. An khaw kawng peng kan thlen chuan, an khaw kawng chu PC Ministry a Brig T. Sailo a laih a nih thu a sawi.

An khua ka thlen chuan an khaw pa fel deuh ho hnenah chuan, hma in sawn loh zia hi in ngaihtuah em? In hnam pui pafa awpna hnuaiah kum 55 in awm tawh a. In kawng erawh chu chakma foreigner thawn kir a, CADC thiah tum ngar ngartu Brig T. Sailo pek che u a nih hi ka ti a.A dik an tih thu an sawi. Foreigner pem lut reng reng lo haw zui zel turin kan ti deuh ngawt a. In chanvo tur an chhuhsak zel zawk che u a nia ka ti a.
“Ni e, kan buai phah lutuk” an ti!

Hmun dang chu ka hrelo na a, Silgur atang hi chuan Chakma hi mikhualte chunga that chhuah thin hnam an niin ka hria.

An khaw zirtirtupa chuan, “ZPM vote tur thlengin kan nei ve tho a nia” tiin a sawi.

DIBLIBAGH LAMAH

Silgur leh Diblibagh hi an awmna inletling thawk a ni a. Diblibagh lamah kan kal leh ta vang vang a. Diblibagh lam kawng erawh a te na a, an khaw kawng a tha hle. MNF an tam berin ka hria, chakma vek an ni nachungin.

Diblibagh-a kan va kal chhan hi, a hma zana Congress leh BJP intih buai vang a ni a. Kan han zawh chian erawh chuan, eng tehchiam mah phei chu a lo ni lo a. An khaw BJP hruaitu pawh kan han ko a, kan han zawt chiang a, an lo inhek tawn ve mai mai a lo ni ve bawk a.

Dinthar lama kan kal duh avangin, lawnga min hruaitu tur chakma lawngpu kan koh tir a. Amar Joyty-a a lo kal a. MNF ruh tak mai, a hma zana khawdanga campaign lo let chiah a ni nghe nghe.

A lawng chuan, Dinthar lam chu kan han kal a. Khawthlang tuipui hmingthang takah chuan lawngah kan chuang a ni ve tar eng mai. Lui laiah a lawng a chhe ta tlat mai a, an han ti ngial a, a that theih loh avangin a thiante an va ko a. Lui laiah kan lo nghak tan gat ngat a. An thianpa lawng chuan Dinthar lam chu kan pan ta a.

Dinthar hi tuikuk chhungkaw 19 awmna a ni a, Inthlan hmaa tuikuk lo kir hnuhnung ber an ni. BJP tlemte tih loh chu MNF vek an ni. Dinthar kan va thlen lai hian BJP candidate pa lo awm lai a ni nghe nghe.
Lawng bawk chuan, Diblibagh panin kan let leh a. Diblibagh-ah chuan MNF candidate Robert Hmingthansanga nen pawh kan inhmu nghe nghe.

Amar Joyty-an ama lawng chunga kan chuan laiin, “Pu Samson Thanruma hunlai atang tawhin Mizo pain Mizo candidate vote loin, Chakma pa a vote zawk thin a” a ti kauh kauh a. Tlabunga vote 1000 kan hmuh phak chuan kan tlin ve theih mai chu ka ring a ti nghe nghe. A thil sawi dangte chu han sawi chhawn vek chi pawh a ni chiah lo zawk.

INTHLANNI

Inthlanni hian, mar Boat pute Vote thlaka an kal bo rei avangin hmun dangah kan kalsawn thei lo a. Tlabungah hun kan hmang ni leng.

Tlai lamah vote thlak tum an inhnawh khawm a. Harsatna erawh kan nei lem lo. Tlabung Dinthar-a Tuikukte chu camp-a vote thla tur anga tih an lo ni a, an lungawilo hman viau nain, harsatna thleng loin chin fel a ni a, anni pawhin an vote an thlak.

Tlabung thalaite nen vote thlak ngaihchan pahin polling station bulah kan titi a, thil tam tak kan sawi a. Helai hmuna Mizo hnam hmangaihte, thahnem lo ngaih viau mai te hi a khawhar thlak awm mange aw, tihna rilru kan nei a. An thil min hrilh pakhat chu, mizo zinga kan hruaitu langsar tak Tlabung zu tlawhtu kha, khawthlang tuipuiah lawngah an chuanpui a, “Hei hi, eng tuipui nge kha?” a ti e, an ti. A rilru natthlak hial thu an sawi a. An sawi pawh a dik chiah a, kan ram kan hriat chian loh zia ti chiangtu a ni. Kan ram hrechiang mang lo hi chuan, ram leh hnam tana thutlukna tha hi siam a har thin ang.

MNF hruaitupa min hrilh pakhat chu, Chakma zingah hian tun thlenga la PC ngar ngar an awm tih a sawi a. MNF a lut tawh engemaw zat pawhin PC rilru an la pu tlat e, a ti! Chakma hi helai bialah hian an pung ta em mai a. Manganthlak lam a ni tawh a. Thiam leh fing taka hmalak hi a hun tawh reng reng a. Thil reng reng hi haw hawa nawr hlawhtlin theih hi a tam tawh lo khawp mai, he khawvelah hian. Mizoram sawrkar hian tihtur pawimawh tak a neiin ka hre thar leh zual.

Zanah dar 12 thlengin Polling party te kan lo nghak a. Pakhat kan nghak chhuak lo a, Lunglei lam kan pan ta a. Zan dar 12 :30 velah tlabung kan chhuah san a. Zing dar 7 hma hretin Saikuti Hall kan thleng. Ka bial (west Tuipui AC) polling party lo thlen kim ka nghak a. Dar 7 pelh deuhah an lo thleng kim ve.

Published by

admin

Ka hunawlah lehkha ka ziak thin.

3 thoughts on “TLABUNGAH INTHLAN”

  1. Mithiam, rualawhna a khat, hei lo ram dang hmangaih tur kan nei lo tih hre chin te kam liam han dungchhir zet chuhhh…lunglam kan vai rum rum zu nia!!

Leave a Reply

Your email address will not be published. Required fields are marked *