WASHINGTON-A TAWNGTAINA

washingtonKhawvela mi ropui ber berte hi tawngtai mi an ni a, ram hruaitu ropui ber berte hi Pathian ringa a hnena tawngtai thin an ni. Khawvel ram ropui tak mai USA lo din chhuahna pawh khu Pathian mite rinna vang a ni.
USA khu tun hma chuan British hoin an awp thin a, kum 200 chuang kal ta khan USA a mi chengte chuan anmahni awptute lakah chuan Zalenna an sual ta a. Chuta an hotupa ber chu General George Washington-a a ni. He Indonaah hian George Washington-a hi tum tam zawk a chak lo a. British lam chuan an nawr tlawm zel mai a. 1777 fawvang awllen lai chuan British sipai hotupa General Howe-a chuan Philadelphia a la a. Thlasik a lo thleng chho zui a, Philadelphia atanga hla loteah chuan General Washington-a leh a sipai chau tak te mai chu an inkulh ve bawk a. He hmun hi Valley Forge an ti a.

Tlang bawk hmun a ni a, December ni 19, 1777 atang he hmunah hian General Washington-a hote chu an inkulh tan a, a vawt em em mai a, chaw ei tur lah chu an ngah lo khawp leh nghal a. Indonaah a chan chhe zawkah USA lam te chu an tang char char mai bawk si a. Chu an inkulhna hmunah chuan dinhmun chhe em emin an awm a,.
Mahse, an hotupa ber General Washington-a chu Pathian tihmi, inkhawm peih, Bible chhiar taima leh tawngtai taima em em mai a ni a. Ramhnuaiah tawngtai turte pawhin a kal hrang fo thin a. Tin, biak in awmna hmun a piangah pawh a inkhawm mai thin a ni.
He hmun, Valley Forge hmunah hian dinhmun chhe em em maiin an awm a, hetah hian General Washington-a hi a tawngtai leh a. Heta a tawngtaina hian an indonaa an dinhmun chu a ti danglam a, Zalenna sual tura an indona-ah hian an che tha chho tan ta a ni.
Valley Forge khawmi Isaac Potts-an General Washington-a ramhnuaia a tawngtai lai hi a lo hmu a, a hmuh dan chu heti ang hian a sawi,
US hian Great Britian hi an hneh theih ka ring lo reng reng a, an sipai te leh an indo lawngte chu khawvela chak ber an ni a, amhse, thil mak tak a thleng a, chu chuan Pathian pawh min rin tir daih a ni. George Washington-a sipai te chu valley forge hmunah hian an awm a, an chau em em mai a. An beidawng tawh a ni. Amah General Washington-a chauh lo chu. Tumkhat chu valley Forge ka kaltlang a, 1777 thlasik laiin, Thing dingkhup karah chuan mi pakhat tawngtai ri hi ka hre ta a, ka sakawr ka ti ding a, ri ka hriatna lam chu zawitein ka va en ta a, Washington Ropuia chu thingthi-in tihtakzet hian a lo tawngtai a, a ngunhnam chu a dinglamah a dah a, a sipai lukhum chua veilamah a dah a. Sipai Hote lalpa hnenah an harsatna pui turin a dil a, hun harsa taka an awm chu chhan chhuak a, khawvela a ropuina puan chhuahnana hmangturin Pathian hnenah a dil mek hi a lo ni a.,
Chuti ang tawngtaina chu mihring hmui atanga chhuak hi ka la hre ngai lo, a ropui lutuk!!!!
‘In-ah ka haw a, ka thil hmuh chu ka nupui ka hrilh a, chutiang reng reng chu ka la hmu ngailo tihte ka sawi a, Mi hi kristian a niin, sipai a ni bawk theiin kan ring ngai lo a, mahse, Washington-a chu chuti ang mi chu a ni. A tawngtaina chu Pathian lawmzawng a nih chuan Pathianin a chhang anga, America a lo ding chhuak ngei ang kan ti dun a” tiin a sawi.
Pathian chuan George Washington-a tawngtaina chu a chhang ta ngei a, Valley Forge hmun atang hian Washington-a sipai te chu an che tha chho tan ve ta a, A tawpah chuan Indonaah hnehna an chang a, USA chu Independent ram a lo ni ta a, washington-a chu an president hmasa ber a lo ni ta a ni. Washington-a chu tawngtai mi tia hriat a o ni ta reng a ni.
US President 16-na, Abraham lincoln-a kha President-a lakluh a lo nih khan, “Lalpa, George Washington-a tawngtaina I chhang thin ang khan, ka tawngtaina hi chhang ve ang che. He ram hi I duhdana kaihhruai turin ka kut ti chak ang che:” a ti a. USA chhim leh hmar an indo a, sal chhuahtu Presdident ropui tak a lo ni ta a ni.
(Heta milem ka dah hi Arnold Friberg-a ziah a ni.)

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *